BDU tələbələri uğurlu karyeranın sirrlərini öyrəndilər
BDU-da "Zamanın idarə olunması və müvəffəqiyyətli karyera" təlimi keçirilib.
Ölkə.Az xəbər verir ki, 5 noyabr tarixində Bakı Dövlət Universitetinin akt zalında Tələbə Həmkarlar İttifaqı Komitəsinin (THİK) təşkilatçılığı ilə "Zamanın idarə olunması və müvəffəqiyyətli karyera" mövzusunda təlim keçirilib.
Təlimdə BDU THİK sədr müavini və komitə əməkdaşları, tanınmış təlimçi Fəxri Ağayev və universitetin müxtəlif fakültələrinin tələbələri iştirak ediblər. İlk olaraq çıxış edən BDU THİK sədr müavini İlkin Şərifov hər kəsi salamlayaraq komitə sədri Daşqın Qənbərovun da salamlarını çatdırıb.
"Həyatda özünə layiq yer tutmaq üçün hər bir tələbənin doğru zaman bölgüsü, həyatda uğur qazanmağın sirrlərini öyrənməsinə ehtiyac var. Təhsil müddətini səmərəli şəkildə keçirmək və sonrada həyata atıldıqdan sonra uğurlu və müvəffəqiyyətli karyeraya sahib olmaq hər bir gəncin istəyidir. Ölkəmizdə yaradılan şərait, geniş imkanlar olsa da, son sözü biz gənclər deməliyik. Bütün bunlara layiq olmaq və sözün yaxşı mənasında istifadə etmək məqsədilə hər gün səylə çalışmalı, inkişaf etməliyik. Bugünkü tədbirimizin əsas amalı uğur əldə etməyin yolunda nələrə diqqət etməli , hansı prinsiplərə söykənməli olduğumuzu öyrənməkdir", - deyə, sədr müavini bildirib.
Daha sonra isə təlimçi Fəxri Ağayev tələbələri salamlayaraq özü haqqında geniş məlumat verib.
Qeyd edək ki, Fəxri Ağayev ali təhsilini Türkiyənin Mərmərə Universiteti, "Economics and Business Management" Fakültəsində alıb. Hal-hazırda o "Business Management" üzrə Qafqaz Universitetində müəllim qismində çalışır. Fəxri Ağayev Caspian Express, Subaru Azerbaijan və Hyundai Auto Azerbaijan kimi firmalarının rəhbər vəzifələrində işləyib və xaricdən Azərbaycana gəlmək istəyən iş adamlarına biznes sahəsində konsultasiyaların təmin edilməsi üzrə mütəxəssisdir.
Təqdimatın ardından qonaq təlimə başlayıb. İlk olaraq uğurlu karyera haqqında məlumat verən Fəxri Ağayev daha sonra tələbələrə vaxtın necə səmərəli istifadə olunması və günün necə düzgün planlaşdırması haqqında məlumat verib. Olduqca maraqlı keçən təlimdə Fəxri Ağayev şəxsi və iş təcrübəsində rastlaşdığı faktlarla gənclərə maraqlı məlumatlar verib.
"Azərbaycanda müvəffəqiyyətli olmaq digər Avropa və Amerika ölkələrindən qat-qat rahatdır. Çoxları elə hesab edir ki, xaricdə yaşamaq artıq müvəffəqiyyətli olmaqdır. Əsla elə deyil, bizim ölkədə uğur qazanmaq üçün hər şey var", - deyə təlimçi bildirib.
Təlim müdətində Azərbaycanda müvəffəqiyyətli olmaq, həyatımız və balans, zaman və zamanın idarə olunması, şans və bəxt, uğurumuz üçün nə etməli kimi məsələlərə toxunulub.
Təlimin sonunda təlimçi tələbələri maraqlandıran bir çox sualları cavablandırıb.
Rəşid Mustafazadə
Ölkə.Az
