Aleksandr Lapşin Bakıya gətirildi

Dağlıq Qarabağa qanunsuz səfər edən və Belarus Ali məhkəməsinin qərarı ilə Azərbaycana ekstradisiya olunan bloqqer Aleksandr Lapşin bu gün axşam Bakıya gətirilib.

“Ölkə.Az”-ın Heydər Əliyev adına Beynəlxalq Hava Limanına ezam olunan əməkdaşı xəbər verir ki, Minskdən Aleksandr Lapşini gətirən təyyarə Bakı vaxtı ilə saat 22:00 radələrində hava limanına enib. Aleksandr Lapşinin hava limanından Azərbaycanın Baş Prokurorluğuna aparıldığı güman olunur.

Xatırladaq ki, Belarus Ali Məhkəməsi bloqqer Aleksandr Lapşinin Azərbaycana ekstradisiyası ilə bağlı şikayətini təmin etməyib.

Onu da bildirək ki, Rusiya, İsrail və Ukrayna vətəndaşlığı olan bloqger Aleksandr Lapşin 2011-ci ilin aprelində və 2012-ci ilin oktyabrında Azərbaycanın işğal altındakı ərazilərinə qanunsuz səfərlər edərək separatçı rejimin təbliğatı ilə məşğul olub. O, Azərbaycanın ərazi bütövlüyünə qarşı çağırışlar edib
Azərbaycan Baş Prokurorluğu A.Lapşin haqqında Cinayət Məcəlləsinin 281.2 (dövlətə qarşı açıq çağırışlar) və 318.2 (sərhədi qanunsuz keçmək) maddələri ilə cinayət işi qaldırıb və o, beynəlxalq axtarışa verilib.

A.Lapşin Belarusda saxlanılıb. Belarus baş prokurorunun müavini Azərbaycan tərəfinin ekstradisiya tələbini haqlı sayıb. A.Lapşinin vəkili bu qərardan Minsk şəhər Məhkəməsinə şikayət edib. Lakin Minsk şəhər Məhkəməsi Baş Prokurorluğun qərarını əsaslı sayıb. Bu qərardan isə Ali Məhkəməyə şikayət verilib.