Şəhid ailələri: "Düyü, çay və duru yağla başımızı aldadırlar..."

Şəhid ailələri və itkin düşmüş insanların bir qrup yaxını Ölkə.az-a problemlərinin həll olunmaması ilə bağlı müraciət ediblər.

Onlar, şəhid olanlara veriləcək 11 min manatlıq sığorta pulunun (qan pulunun) verilməməsindən, yazıldıqları ev növbəsinin hələ gəlib çatmamasından, Qarabağ əlillərinə maşın verildiyi halda, şəhid ailələrinə və itkin düşmüşlərin ailələrinə bu imtiyazın verilməməsindən şikayət edirlər.

Hüseynov Alqayıt Şakir oğlu atasının Xocalıda şəhid olduğunu deyir. "1998-ci ildən ev növbəsində durmuşuq. Bizi ancaq hansısa təşkilat şəhid ailələri və itkin düşmüşlər haqqında tədbir keçirəndə bir yerə yığrılar və mənasız söhbətlər edib sonra da düyü, çay, şirə, bir az da duru yağ verib başımızı aldadırlar. Bizi bu cür şeylərlə aldatmaq lazım deyil. Şəhidlərin 11 min manatlıq qan pulu var, onu versinlər. Başqa şey istəmirik ki, qanunun bizə verdiyi imtiyazdan yararlanmaq istəyirik. Evdə qazan qaynamayandan sonra keçirilən bu tədbirlər yarışları nəyə lazımdır?".

Fərhadov Baratın 18 yaşlı oğlu Şuşada, Malıbəylidə şəhid olub. "Bizimlə heç kim, heç bir təşkilat maraqlanmır. Ancaq özlərinə sərf edəndə və öz reklamları üçün lazım olanda bizi çağırıb bir yerə yığırlar. 70 yaşım var, çöllərdə yaşayıram, nə evim var, nə eşiyim. Heç olmasa şəhidimizin qanpulunu versinlər. Biz haqqımızı tələb edirik. Qarabağ əlillərinə yüzlərlə maşın paylanır, ancaq şəhidlərin qanpulunu vermirlər".

Əliyeva Nəsibənin 18 yaşında Fuad Hüseynov adlı oğlu itkin düşüb. "Nə dərdimizi dinləyən var, nə də bizimlə maraqlanan. 2004-cü ildən ev növbəsinə durmuşuq ancaq evimizi vermirlər. 3 ildir şəhidlərimizin qanpulunu vermirlər ki, ailələri getsin özünə gün ağlasın. Yalnız hansısa tədbirdə, bir də qurban bayramında yadlarına düşürük. Onda da bizim başımızı 200 qram ətlə aldadırlar. Vaqonda yaşayırıq, bunu hər bir orqan bilir ancaq dərdimizə yanan yoxdur".

Səxavət Məmməd
Ölkə.az