\"Siyavuş Novruzovun Aygün Kazımovanın mahnılarına qulaq asmaqdan başı açılsa...\"

"Müsavat" partiyası daxilində fraksiyanın yaradılması barədə gedən işlər, Qubad İbadoğlunun tərəfdarlarının "Müsavat" başqanı Arif Hacılıya "ilk zərbə endirdik" deməsi və hakimiyyət tərəfinin yaradılması planlaşdrılan fraksiyanı "boş-boş oyun" adlandırmasına görə Müsavat" partiyasının məclis üzvü Tural Abbaslı Ölkə.az-a münasibət bildirib.

Tural Abbaslı: "1-ci gün partiya daxilindəki vəziyyət və fraksiyanın yaradılması barədə diskusiyalar aparıldı. Razılaşma oldu ki, işçi qrupu həftənin 6-cı günü bir daha yığışsın, tez bir zamanda fraksiya və onun strukturu ilə bağlı təklifləri dəyərləndirsin, fraksiyanın forması, fəaliyyət istiqaməti, məramı barədə sənəd hazırlasın. Fraksiyanın yaradılması istiqamətində danışıqlar gedir, çox güman ki, fraksiya yaradılacaq. Həm biz, həm də Qubad İbadoğlu tərəf fraksiyanın yaradılamasının tərəfdarıyıq.
Məqsəd burda Arif Hacılıya, və yaxud kiməsə zərbə vurmaq deyil. Fraksiyanın yaradılmasını ona görə təklif etdim ki, partiya daxili mühit yaxşılaşsın, partiya daxili demokratik mühit yaradılsın. Mənim məqsədim Arif Hacılıya zərbə vurmaq, onu gözdən salmaq, partiyanın işinə mane olmaq deyil. Bizim istəyimiz odur ki, partiya daxilində tək hakimiyətlilik olmasın, narazıların səsi eşidilsin. Narazı insanların səsi eşidilməyəndə bir çıxış yolu qalır, istefa verib getmək. Bunu hamımız gördük. Fraksiyanın yaradılması həmdə istefaların qarşısını alacaq, partiya daxilində demokratiya yaranacaq. Kimsə Arif Hacılıya zərbə vurmağı düşünürsə, məncə, bu düzgün addım deyil. Mənim şəxslərlə, adlarla, soyadlarla probemim yoxdur. Partiya daxili mühitü bu gün Arif Hacılı bizim görmək istədiyimiz istiqamətdə quracaqsa, bizdə fraksiya və digər fəaliyyətlərə ehtiyac duymayacağıq. Məqsədimiz Müsavatın partiya daxilindəki demokratikliyini qorumaqdır.

Siyavuş Novruzov və onun kimi fraksiyanı oyun adlandıran hakim partiya nümayəndələri özlərini ifşa edir. Hakim partiya nümayəndəsi ana müxalifət partiyası daxilində gedən diskusiyaları boş-boş oyun adlandırırsa demək ki, bu adamların demokratiyadan, siyasətdən anlayışı yoxdur. Özlərinə layiq sənətçilərə xalq artisti adı verib bütün günü onların konsertində iştirak etməkdir onların işi. Siyavuş Novruzovun Aygün Kazımovanın mahnılarını dinləməkdən vaxtı olsa, başını qaldırıb internetdə baxsa, dünyada baş verən partiya daxili diskusiyaları, tarixdə baş verən partiya daxili diskusiyaları analiz etsə, görəcək ki, əslində "Müsavat" daxilindəki bu diskusiyalar Azərbaycan demokratiyasına bir tövhədir. Pioner böyüyüb komsomol olanda biləcək nə baş verir, o hələ ki, pionardı".

Səxavət Məmməd
Ölkə.az