Doğulan oğlan uşaqlarının çoxalması cinsi tarazılığı poza bilər?
Azərbaycanda selektiv abortların qarşısının alınması üçün doğulanlar arasında cins nisbətinin pozulmasının aradan qaldırılmasına dair Tədbirlər Planı hazırlanması nəzərdə tutulur.
Əmək və Əhalinin Sosial Müdafiəsi Nazirliyindən verilən məlumata görə, hazırda müzakirə mərhələsində olan “Azərbaycan Respublikasında əhali sakinliyi və demoqrafik inkişaf sahəsində Dövlət Proqramı (2014-2025-cı illər)” layihəsində qeyd edilib.
Layihəyə görə, bu kimi halların qarşısının alınması üçün ölkədə doğulanların cins nisbətinin monitorinqinin həyata keçirilməsi nəzərdə tutulur.
Ölkə.az bu barədə “Təmiz Dünya” İctimai Birliyinin rəhbəri Mehriban Zeynalovanın fikirlərini öyrənib. İB sədrinin sözlərinə görə, ölkə ərazisində qız uşaqlarının artırılmasına bir qədər ehtiyac var.
"Bu layihənin həyata keçirilməsi indiki halda nə dərəcədə reallığa uyğundur bu barədə bir şey deyə bilmərəm. Hazırda qız uşaqlarının sayı kifayət qədər azalmaqda davam edir. Yəqin ki, layihə çərçivəsində bu nəzərə alınacaq və qız uşaqlarının artırılması üçün layihələr planı hazırlanacaq. O zaman bu balanslaşmaya yəqin ki, öz təsirini göstərəcək. Bu mövzu müzakirə ediləcəksə, o zaman abortların qadağan olunması məsələsi bir daha gündəmə gələcək. Amma onu da deyim ki, mən Polşada olanda Abortların qadağan olunması məsələsində aparılan təcrübəyə baxdım, yəni aparılan təcrübələr bu sahədə də elə bir effekt verməmişdi. Çünki o layihədə kriminallaşmanın qarşısının alınması məsələsi də nəzərdə tutulmalıdır. Hesab edirəm ki, layihədə həmin məqamlar öz həllini tapacaq. Əhalinin artımı məsələsi bütün ölkələri narahat edən məsələlərdən biridir. Odur ki, günün tələbinə uyğun olaraq bu məsələlərin müzakirə olunmasını yüksək qiymətləndirirəm".
Qeyd edək ki, ölkədə qadınların reproduktiv potensialının tədricən azalmasını (nəsillərin əvəz olunması nəticəsində reproduktiv yaşda olan qadınların sayının dəyişməsini) nəzərə alaraq, Dövlət Proqramı layihəsində doğulan uşaqların sayının 2025-ci ilə kimi hazırkı səviyyədə saxlanılması əsas prioritet kimi qəbul edilir.
Zəruri qeyd: Hazırda ölkəmizdə hər 100 doğulan qız uşağına 116 oğlan düşür.
Fatimə İbrahimova
Ölkə.az
