Qamət Süleymanov Sumqayıtda tutulan vahabidən danışdı

"Bu hadisə ancaq radikalları sevindirir"...

Qeyri-ənənəvi vəhabilik təriqətinin təbliğatı üçün öz həyətində məscid və mədrəsə şəraiti yaratmış Sumqayıt sakini, hazırda polislər tərəfindən saxlanılan Zöhrab Şixəliyev haqqında daha bir məlumat mətbuatda yayılmaqdadır. Yayılan məlumatlara görə, Sumqayıtın tanınmış sələfilərindən, hətta Sumqayıtdakı sələfilərin lideri olduğu iddia edilən Zöhrab Şixəliyevin Əbu-Bəkir məscidinin imamı Qamət Süleymanovun qohumu olduğu iddia edilir.

Mövzu ilə əlaqədar olaraq Qamət Süleymanovla əlaqə yaratdıq. Ölkə.az-a danışan Qamət Süleymanov bildirdi ki, Zöhrab Şixəliyevlə heç bir qohumluq əlaqəsi yoxdur.

"Bismillahir-Rəhmanir-Rəhim. Xeyr, qohumum deyil, ancaq tanışıq. Biz onu həmişə yaxşı insan olaraq tanımışıq. O, Sumqayıtda demək olar ki, radikallara qarşı birinci adam idi. Hamımızı bu hadisə təccübləndirib. Ancaq onunla heç bir qan qohumluğumuz yoxdu. Sadəcə dostumdur, yaxınıq. Mən də ora gedib, gəlirdim. Orada heç vaxt problem olmayıb. O qardaş evini açmışdı ki, gəlin burda namaz qılın. Bu artıq neçə müddət idi davam edirdi, vəssalam. Ona görə də bu hadisə ancaq radikalları sevindirir".

Xatırladaq ki, Qamət Süleymanov bundan öncə 12 oktyabrda keçirilən Milli Şuranın mitinqi zamanı İŞİD bayrağını qaldıran qayını Ramin Quliyevlə gündəmə gəlmişdi.

P.S Z.Şıxəliyevin doğma qardaşının nüfuzlu şiələrdən birinin olması haqqında məlumatlar var.

Fatimə İbrahimova
Ölkə.az