Qulu Məhərrəmli: "Azərbaycanda mətbuat azadlığı var, amma jurnalistlərə tənqid yazmağa imkan vermirlər"

ATƏT-in media azadlığı üzrə nümayəndəsi Dünya Miyatoviçin Azərbaycandakı media azadlığı ilə bağlı bəyanatına növbəti reaksiya media eksperti Qulu Məhərrəmlidən gəlib.

Q. Məhərrəmli Ölkə.az-a verdiyi açıqlamasında Azərbaycanda media azadlığı məsələsinə toxunub. Onun fikrincə, Azərbaycanda media azadlığının olmamasını demək, məsələyə olduqca yanlış yanaşmadır.

"Ümumiyyətlə, Dünya Miyatoviçinin dəsti-xətti kəskin bəyanatlardan ibarətdir. Əlbəttə Azərbaycanda mətbuat azadlığının olmadığını iddia etmək yanlışdır. Azərbaycanda mətbuat azadlığı var, bu faktdır, amma mətbuat azadlığı sahəsində problemlər də var.

Mətbuat azadlığı dedikdə insanların düşündüklərinin mətbuatda əksini tapması, tənqidi fikirlər söyləməli, mətbuatın ictimai nəzarətçi funksiyasını gerçəkləşdirmək üçün mediyanın imkanlarının olması mətbuat azadlığını şərtləndirən amillərdir.

Azərbaycan reallığında tənqidi mətbuat orqanları var. Bunların da müəyyən dərəcədə müxalif, tənqidi fikirləri var. Söhbət də ondan gedir ki, bu cür mətbuat orqanlarının yazdıqlarının cəmiyyətə hər-hansı bir təsiri varmı və onlar yazdıqlarına görə cəzalandırılır, yoxsa yox?

Mən hesab edirəm ki, Azərbaycanda mətbuat azadlığı var, amma təbii ki, mətbuat azadlığı ilə bağlı problemlər də var. Bu problemlər isə bütün ölkələrdə var. Sadəcə olaraq bizdə son illərdə gedən proseslərdə mətbuat azadlığının nisbətən məhdudlaşdırılması görülür. Yəni tənqid, araşdırma tipli materiallar azalır. Bunlar da görünür xarici ekspertlərin diqqətini cəlb edir. Məsələnin bu cəhəti realdır.

Araşdırmanın azalması həm də peşəkarlığın aşağı olmasından irəli gəlir, üstəlik jurnalistlər araşdırma aparmaqdan çəkinirlər. Çünki onlar informasiya mənbəyinə yaxın ola bilmir və lazım olan informasiyanı ala bilmirlər. Görünür bu sahədə problemlər olduğuna görə, xarici ekspertlərdə də bu cür qənaətlər formalaşır. Amma mən qətiyyən o fikirdə deyiləm ki, Azərbaycanda mətbuat azadlığı yoxdur. Bu olduqca yanlış yanaşmadır".

Xatırladaq ki, ATƏT-in media azadlığı üzrə nümayəndəsi Dünya Miyatoviçin Azərbaycandakı media azadlığı ilə bağlı bəyanatında məhdudiyyətlərin, media azadlığında çatışmazlıqların olduğu iddia edilmişdi.

Fatimə İbrahimova
Ölkə.az