Bakıda biznes mərkəzində HAVASIZLIQ

Məlumata görə, ofis icarəyə götürənlər biznes mərkəzində pəncərələrin olmamasından şikayətlənirlər. Onlar rəhbərlik qarşısında pəncərələrin açılması ilə bağlı təklif irəli sürsələr də, qəbul edilməyib. Bildirilib ki, hər hansı ofis kirayəçisi pəncərənin açılmasını istəyirsə, 1 pəncərə üçün 2 min dollara yaxın ödəniş etməlidir. Yəni, pəncərənin quraşdırılması üçün maliyyə ofis kirayə götürənin üzərinə düşür. 

Bundan narazı qalan şəxslər biznes mərkəzini tərk edəcəklərini bildiriblər.

Xatırladaq ki, bir müddət əvvəl, "Demirchi Tower"in mərtəbələrində siqaret çəkilməsi qadağan edilib. Siqaret yalnız binanın qarşısında çəkilir. Siqaret çəkilməsi üçün yerlərin ləğv edilməsi müəyyən problemlər yaradıb. Belə ki, işçilərin siqaret çəkmək üçün 1-ci mərtəbəyə düşməsi liftləri məşğul edir, liftlərin qarşısında uzunmüddətli növbələr yaranır. Bu da orada ofis kirayələyənlərin işinə əngəl olur.

Azad İstehlakçılar Burliyinin sədri Eyyub Hüseynov isə "Ölkə.Az"-ın əməkdaşıyla söhbətində bildirib ki, istehlakçılar vəziyyətdən çıxış yolu kimi boykota əl ata bilərlər. 

"Azərbaycanda biznes qurumları üçün çoxssaylı ofislər var. Seçim imkanı böyükdür. Belə olan halda istehlakçılar narazı qaldıqları yeri boykot etməlidirlər. Onda "Demirchi Tower"in rəhbərliyi onlara yalvaracaq. Bu istehlakçıların hüququnun pozulmasıdır. Mövcud qanunvericiliyə görə hər mərtəbədə siqaret çəkmək üçün xüsusi yer ayrılmalı və havalandırma sistemi olmalıdır. Pəncərənin açılmasına görə 2 min manat tələb etmək də qanuna ziddir. Binanın konstruksiyasında pul naminə dəyişiklik aparmaq da olmaz. İstehlakçılarla bağlanan müqavilə şərtlərində belə bir müddəa yoxdursa, tamamilə qeyri-qanunidir. Ümumiyyətlə, tikinti sənayesində böyük problem var. Bina tikilir, əhali köçür və sahibkar ondan sonra həmin binanın qarşısında ikinci binanı tikir. Fövqəladə Hallar Nazirliyinin (FHN) bu işdə böyük təqsiri var. FHN, digər dövlət orqanları istehlakçıların aldanmasını istəmirsə, təhvil alınan və alınmayan binaların siyahısını saytlarına yerləşdirsinlər. Çox sadə bir şeydir. İstehlakçı da bilsin ki, bu ev təhvil alınmayıb və oradan mənzil almaq olmaz. Dövlət prinsipial mövqe nümayiş etdirməlidir". 

Ölkə.Az