Parkomat, DYP, Evakuator və ya "əlbir olub bir ayı bir şir ilə"...

Bakının az qala hər bir küçəsində "Parkomat" quraşdırılıb, hər "Parkomat"ın yanında da bir işçi...

Artıq əvvəlki kimi maşını istədiyin yerdə saxlayıb dayanacaq gözətçisinə 20 qəpik verərək can qurtarmaq olmur. "Parkomat"lardan razı olanlar da var, narazılar da. Sürücülərin fikirlərini öyrənmək üçün Ölkə.az əməkdaşları şəhərə çıxırıq.

Əhməd Rəcəbli küçəsindəyik. Hər 100 metrə bir "Parkomat" düşür. Yanındakı "Parkomat" işçisinə yaxınlaşırıq, kameranı görüb uzaqlaşır.

Nərimanov metrosunun çıxışına doru irəliləyirik. Burada "Parkomat"lar yolun kənarında yox, səkilərin üstündə quraşdırılıb. Metronun üstündəki dayanacaqlarda quraşdırılmış "Parkomat"lar arasında məsafə isə 50 metrdən də azdır.

Sürücülərə yaxınlaşırıq. Adil kişi deyir, əslinə qalsa "Parkomat"ların quraşdırılmağı çox yaxşıdır, ancaq bunun da öz çatışmamazlığı var. Harada gəldi quraşdırıblar bu qurğunu. Baxmayıblar küçə dardıd, ya geniş, gəlir olsun deyə az qala hər bir küçədə "Parkomat" quraşdırıblar. Açığı çox adam heç ora pul atmadan gedir. Heç "Parkomat"ın işçiləri də o dərəcədə öz işləri ilə məşğul deyillər. Uzun müddətli maşın saxlayan adamlardan 5-10 manat pul alıb aradan çıxırlar. Bunları "Parkomat"a nəzarətçi qoyublar, bunların özlərinə nəzarət edən lazımdır.

Sürücülərin bir çoxu "Parkomat"lardakı qiymətlərdən narazılıq edir. Qərib adlı sürücü deyir ki, əvvəl bəzi yerlərdə dayanacaqlar var idi. Dayanacaq nəzarətçisinə 20 qəpik verirdik maşınımızı saxlayıb rahat şəkildə işimizin dalınca gedirdik. İndi 1 saatı 50 qəpik ediblər. 50 qəpik bir saat üçün çoxdur.

"Parkomat"larla bağlı ən maraqlı şey isə odur ki, əvvəllər maşın saxlamağın qadağan olduğu yerlərə indi "Parkomat" quraşdırılıb. Əgər əvvəllər orda maşın saxlamaq qadağan idisə, "Parkomat"lar quraşdırıldıqdan sonra nə dəyişdi ki, maşın saxlamaq qanuni oldu?

Hacıbalanın "Parkomat" adlı bəlası

"Parkomat"lara işçi təyin ediblər. Onlar hansı maşının "Parkomat"a pul ödəyib-ödəmədiyinə nəzarət edirlər. Əgər “çek” yoxdursa DYP-yə və yaxud evakuator xidmətinə zəng edirlər. DYP əməkdaşları gəldikdə əgər park edilmiş maşının üzərində qəbz görmürlərsə, maşına 20 manat cərimə yazırlar. Evakuator xidməti isə maşını cərimə meydançasına aparır.

Məsələni dəqiqləşdirmək üçün "Parkomat"ın işçisinə yaxınlaşırıq. Kameraya danışmayacağını deyən "Parkomat" işçisi bildirir ki, biz işçiyik. Bizə nə tapşırırlar onu da edirik. Maşını park edən sürücüdən xahiş edirik ki, "Parkomat"a pul ödəsin. Bəzi sürücülər var ki, artıq buna alışıblar. Özləri gəlib pulu ödəyib gedirlər. Ancaq bəzilərinə dəfələrlə demək məcburiyyətində qalırıq. Elə sürücülər də var ki, pul ödəməkdən boyun qaçırıb gedir. Bu zaman DYP-nin əməkdaşlarına, ya da evakuatr xidmətinə zəng edirik. DYP əməkdaşları qəbzsiz maşın gördükdə həmin maşın sahibini 20 manat məbləğində cərimələyirlər. Evakuatorlar isə maşını aparır. Biz işə girəndən bizə nə tapşırıblar, onu da edirik.

"Parkomat"a pul ödəyən qadın sürücü Şəhla xanma yaxınlaşırıq. Şəhla xanım "Parkomat"ların şəhərin fərqli yerlərində fərqli qiymətə olmasından narazılıq edir. Deyir, bu yaxın zamanda “Tarqovu” kimi tanınan Nizami küçəsində maşın saxlayanda "Parkomat" işçisi bildirdi ki, 1 saat üçün 1 manat ödəməlisiniz. Ancaq şəhərin başqa yerlərində 1 saat üçün 50 qəpikdir. Şəhər kənarında yaşadığını deyən Şəhla xanım bildirdi ki, şəhərə çox az gəlməyə çalışır. Səbəb odur ki, maşın saxlamağa yer tapmır. Ona görə də bu məsələnin birdəfəlik həll olunmasını arzulayır.

Taksi sürücüləriilə söhbət edirik. Həsən kişi deyir, bizdən pul almırlar. Əslinə qalsa bəziləri deyir qiymət bahadır, ancaq maşınlar üçün tikilən dayanacaqlarda qiymətlər daha da bahadır. "Parkomat"ların quraşdırılması yaxşı fikirdir, ancaq bunu da qazanc mənbəyinə çeviriblər. Dayanacaqlar da Hacıbala Abutalıbov tərəfindən monopoliyaya alınıb.

Şakir adlı taksi sürücüsü isə bildirir ki, "Parkomat"ların çox yaxşı cəhəti var. Dayanacaqlar arasında məsafə çox uzaqdır. Dayanacaqda saxlayıb harasa getmək üçün gərək marşurutdan istifadə edəsən, ancaq "Parkomat"lar quraşdırıldıqdan sonra maşını "Parkomat" olan hər yerdə saxlamaq olar.

Malik adlı taksi sürücüsü isə "Parkomat"ların heç də düzgün bir şəkildə yerləşdirilməməsindən danışdı. Malik kişi bildirdi ki, şəhərin elə yolları var, orada iki maşın güclə yanaşı hərəkət edir, ancaq o yolda da "Parkomat" quraşdırıblar. Elə adam var yaxşı sürücüdür normal saxlayır, eləsi də var ki, heç maşın saxlamağı belə bilmir, yolun ortasında saxlayır. Bu zaman isə istər istəməz tıxac yaranır. Tıxacların əksəriyyəti də dayanacaqların səhv yerlərdə salınmasından əmələ gəlir. Buna nəzarət edən demək olar ki, yoxdur. Polislə, evakuatorla "Parkomat" işçiləri demək olar ki, əlbir işləyirlər. "Parkomat" işçiləri pul ödəməyən maşın görən kimi DYP-yə, ya da evakuator xidmətinə zəng edirlər. Məsələni öz aralarında həll edirlər. Elə "Parkomat" işçiləri də var ki, özlərinə “müştəri” tapıb ondan bir neçə manat pul alıb, maşınına gün ərzində nəzarət edir.

Sahib kişi isə deyir ki, "Parkomat"lar quraşdırılmamışdan bir müddət öncə yol kənarlarında bir aya yaxın maşın saxlamağa icazə vermədilər. Sonradan aydın oldu ki, Hacıbala Abutalıbov şəhərə yeni pul tələsi, "Parkomat" gətirib.

Sürücülərlə söhbətdən sonra belə nəticəyə gəlirik ki, əslində çox müasir və yeni bir şey olsa da "Parkomat"ları da "azərbaycansayağı" istifadə edirik.

Məmurlar, yəni şəhər meriyası və DYP əməkdaşları dayanacaqları monopliyaya alıb, pulun tək əldə cəmlənməsi ilə məşğuldu. "Parkomat" işçiləri isə "Parkomat"dan kart çıxartmadan “para” qazanmaqla...