Avtobus sürücülərinin yeni oyunu
Bu barədə “Ölkə.Az” saytına sərnişinlər bildiriblər. Cavid Babayev adlı sərnişin bildirib ki, bu gün günorta saatlarında 65 saylı avtobusda sürücü bildirib ki, validator işləmir. Bu səbəbdən də, sərnişinlərdən gediş haqqını nağd şəkildə tələb edib.
Məsələ ilə əlaqədar “Xaliq Faiqoğlu” MMC şirkətinin istismar rəisi İbrahim Quliyev “Ölkə.Az”a bildirib ki, hazırda sürücülər ciddi şəkildə nəzarətdədir. Sahə rəisi bildirib ki. Sərnişinlərin səsləndirdiyi iddia əsassızdır.
“Belə şey ola bilməz. Bütün sürücülərə ciddi şəkildə tapşırılıb ki, heç bir halda sərnişinlərdən nağd pul almasınlar. İndiyə qədər bizim avtobuslarda 3 sürücü sərnişinlərdən nağd pul aldıqlarına görə işdən ovulublar. Hazırda bütün sürücülər kamera vasitəsilə izlənilir”, - deyə İbrahim Quliyev bildirib.
Məsələ ilə əlaqədar Bakı Nəqliyyat Agentliyinin ictimai əlaqələr və maarifləndirmə şöbəsinin müdiri Mais Ağayev “Ölkə.Az”a bildirib ki, səslənən ittihamlar müəyyən olunmuş qaydanın pozulması deməkdir. Onun sözlərinə görə, əgər avtobusda validator quraşdırılıbsa, sürücü buna baxmayaraq sərnişinlərdən nağd pul alırsa, bu zaman qaydanı kobud şəkildə pozur.
“Əgər avtobusda quraşdırılan validator xarab olubsa, bu zaman avtobus xətdən geri qaytarılmalıdır. Sürücü avtobusu nasaz vəziyyətdə idarə edə bilməz. Bu nasazlıq barədə kalon rəisinə, yaxud sahibkara məlumat verilməlidir. Sürücü yaranmış texniki nasazlığı yerində aradan qaldıra bilmirsə, həmin avtobus qaraja aparılmalı və problem aradan qaldırılandan sonra xəttə buraxılmalıdır. Kart sisteminə keçən avtobuslarda gediş haqqı nağd şəkildə alınmamalıdır”, - deyə Mais Ağayev bildirib.
Ziya Səccad
Ölkə.Az
