Vahid Əhmədov: “Vətəndaş kredit müqaviləsi bağlayanda onu ödəyib-ödəyə bilməyəcəyini düşünməlidir”
"Ölkə.Az" həmin müsahibəni oxuculara təqdim edir.
– Bu yaxınlarda ölkə başçısı İlham Əliyev Prezident Administrasiyasında bir sıra struktur islahatlarının həyata keçirilməsi üçün sərəncam imzalayıb. Bu sərəncamla Prezidentin bir neçə köməkçisi təyin edilib. Bu islahatların əhəmiyyətini necə qiymətləndirirsiniz?
– Bu, cənab Prezidentin səlahiyyətində olan məsələ idi. Nəhayət ki, Prezident Administrasiyasında gözlənilən struktur islahatları həyata keçirilib. Daha çevik siyasət aparmaq üçün bu sərəncamın böyük əhəmiyyəti var. Bilirsiniz ki, cənab Prezident tərəfindən Milli Strateji Yol Xəritəsi hazırlanıb və təsdiq olunub. Bunu həyata keçirmək üçün çevik idarəetmə mexanizminə ehtiyac vardı. Ona görə də ölkə başçısı tərəfindən belə bir addımlar atılıb. Burada bir-birini təkrarlayan qurumlar ləğv olunub və ya birləşdirilib. Bütün bunlar çox mühüm addımlardır. Hesab edirəm ki, bu addımlar Azərbaycan iqtisadiyyatının inkişafına, çevikliyin artırılmasına və operativ idarəetməyə çox müsbət təsir göstərəcək.
– Bu yaxınlarda Mərkəzi Bankın İdarə Heyətinin sədri Elman Rüstəmov bu ilin sonunadək manatın sabit qalacağını bildirib. Bu məsələ ilə bağlı sizin proqnozunuz necədir?
– Mən həmin açıqlama ilə tanışam. Elman Rüstəmovun bu açıqlamasında həqiqət var. Manatın dəyəri neftin qiymətindən, idxal-ixrac əməliyyatlarından və digər bu kimi amillərdən asılıdır. Bu proseslər 2016-cı ilin sonu, bu ilin əvvəlindən artıq səhmana salınır. Yəni, çox ciddi nəzarət mexanizmi həyata keçirilir. Müəyyən qədər pul qıtlığı yaradılır, hər yerə pul xərclənməsinə qarşı nəzarət mexanizmi gücləndirilir, idxal-ixrac əməliyyatlarında müsbət saldo yaradılır. Bütün bunlar isə müəyyən qədər manatın güclənməsinə və ya qorunub saxlanılmasına imkan yaradır.
Burada əsas məsələ Azərbaycanda real sektorun inkişafı ilə bağlıdır. Yəni, biz elə etməliyik ki, manatın qorunub saxlanılması ölkədə real sektorun inkişafına təsir etməsin. Əsas bu məsələyə diqqət yetirmək lazımdır.
– Azərbaycan Beynəlxalq Bankı ətrafında yaranan problem hələ də həllini tapmayıb. Bu problemin ən asan həllini necə görürsünüz?
– Azərbaycan Beynəlxalq Bankı ətrafında yaranan qalmaqalla bağlı məsələylə dövlət məşğul olur. Çünki bu bank həm də dövlətin bankıdır. Maliyyə Nazirliyi və Maliyyə Bazarlarına Nəzarət Palatası bu sahədə problemin aradan qaldırılması ilə məşğul olur. Məndə olan məlumata görə, bu bankın kreditorlarla problemləri mövcuddur. Bu məsələ də artıq həll olunmaq üzrədir. Bu problem həll olunduqdan sonra, Beynəlxalq Bankla bağlı ajiotajlar da aradan qalxacaq. Hələ 2015-ci ildə cənab Prezidentin Azərbaycan Beynəlxalq Bankının sağlamlaşdırılması ilə bağlı müvafiq sərəncamı olub. Həmin sərəncamda deyilir ki, Beynəlxalq Bank sağlamlaşdırılaraq, özəlləşdirilməyə çıxarılmalıdır. Bu bankı normal qiymətə özəlləşdirmək üçün də mütləq sağlamlaşdırmaq lazımdır. Yəni, borcu olan bankları heç bir sahibkar götürmək istəməz. Ona görə də Azərbaycan Beynəlxalq Bankı dövlət tərəfindən sağlamlaşdırılıb, özəlləşdirilməyə çıxarılmalıdır. Yəqin ki, bu da yaxın vaxtlarda baş verəcək.
Burada əsas məsələ odur ki, əhalinin əmanətləri ilə bağlı Beynəlxalq bankda heç bir problem yoxdur. Mən bu məsələ ilə bağlı Milli Məclisdə maliyyə nazirinin müavini Azər Bayramova sual verdim. Cənab Azər Bayramov da bildirdi ki, bu məsələ ilə bağlı heç bir problem yoxdur. Yalnız xarici kreditorlarla bağlı müəyyən danışıqlar aparılır.
– Devalvasiyadan sonra banklara kredit ödəyən vətəndaşlar problemlərlə qarşılaşıb. Sizcə, bu məsələ necə həll edilməlidir?
– Baxır, hansı kreditlərdən söhbət gedir. Azərbaycanda vaxtı keçmiş kreditlərin məbləği 1,6 milyarda yaxınlaşır. Mən bu yaxınlarda kreditlərlə bağlı görüş keçirmişəm. Həmin görüşdə də söyləmişəm. Ümumiyyətlə, hər bir vətəndaş kredit müqaviləsi bağlayanda onu ödəyib-ödəyə bilməyəcəyini düşünməlidir. Yəni, tələm-tələsik müqaviləyə imza atmaq lazım deyil.
Digər tərəfdən isə hazırda banklarda da ciddi problemlər var. Çünki baş verən son iki devalvasiya banklara ciddi təsir edib, gəlirlərini xeyli azaldıb. Kreditlərlə əlaqədar olaraq indi mənə çox müraciətlər olunur. Mən də həmin müraciətləri banklara göndərirəm, onlar da buna müsbət reaksiya verirlər, müəyyən qədər güzəştə gedirlər. Bu baxımdan da insanları başa düşmək lazımdır. Ümumi razılığa gəlib, bu problemləri həll etmək olar.
Ramal Hüseynli
Ölkə.Az
