Zakir Qaralov: “Azərbaycanda korrupsiyaya qarşı mübarizədə səmərəli mexanizm mövcuddur”
“Ölkə.Az”-ın məlumatına görə, bunu bu gün Bakıda keçirilən İqtisadi Əməkdaşlıq Təşkilatına (İƏT) üzv dövlətlərin prokurorluq, ixtisaslaşdırılmış korrupsiyaya qarşı mübarizə qurumları rəhbərliyi və ombudsmanların 3-cü iclasında çıxışı zamanı Baş prokuror Zakir Qaralov bildirib.
Z.Qaralov deyib ki, korrupsiya hallarına qarşı mübarizə tədbirlərinin gücləndirilməsi daim diqqət mərkəzində saxlanılır:
“Azərbaycan beynəlxalq və regional səviyyədə bütün konvensiyalara qoşulub, bu sahədə qanunvericilik təkmilləşdirilimb, işlək mexanizm yaradılıb. Bu sahədə 3 milli fəaliyyət planının icrası başa çattdırılıb. Korrupsiyaya qarşı Mübarizə üzrə Komissiya və Baş Prokurorluğun Korrupsiyaya Qarşı Mübarizə İdarəsi bu sahədə uğurla fəaliyyət göstərir. Korrupsiyaya qarşı mübarizədə “ASAN xidmət”in rolunu xüsusi vurğulamaq istəyirəm. Burada fəaliyyət korrupsiyanı tam istisna edir. “ASAN xidmət” beynəlxalq səviyyədə digər ölkələrə tövsiyə edilməkdədir. Bu gün tam əminliklə demək olar ki, Azərbaycanda korrupsiyaya qarşı mübarizədə səmərəli mexanizm mövcuddur”.
Z.Qaralov vurğulayıb ki, İqtisadi Əməklaşlıq Təşkilatı müxtəlif mədəniyyətləri birləşdirən bir körpüdür:
“Azərbaycan təşkilatın tədbirlərində aktiv iştirak edir, iki dəfə tədbirlərə ev sahibliyi edib. Azərbaycan iki dəfə bu təşkilata sədr seçilib. Bu baxımdan da İƏT-in tədbirinin Bakıda keçirilməsi mühüm hadisədir”.
Baş prokuror qeyd edib ki, Ermənistanın işğalı nəticəsində 1 milyon insan qaçqın və məcburi köçkün vəziyyətinə düşüb:
“Ulu öndər Heydər Əliyevin hakimiyyətə gəlməsi ilə ölkədə sabitlik təmin olunub, hüquqi islahatlar yolu seçilib. Bu kurs Prezident İlham Əliyev tərəfindən uğurla həyata keçirilir”.
Zaur Əziz
Ölkə.Az
