Paytaxtda yeni il ab-havası
Yeni ilin yaxınlaşması ilə əlaqədar Bakıda bayram ab-havası duyulmağa başlayıb. Paytaxtda yolka agacları, oyuncaqlar, oyuncaq şaxta babalar artıq satışa çıxarılıb.
Bakı şəhər İcra Hakimiyyətinin Ticarət və Xidmət Departamentinin rəhbəri Əliabbas Bağırovun ANS PRESS-ə verdiyi məlumata görə, şəhərin müxtəlif yerlərində, o cümlədən Azneft meydanında yeni ilin atributlarından olan yolka qurulacaq. Qurum rəsmisinin sözlərinə görə, ən böyük yolka Aznef meydanında, yaxud Hökumət evinin qarşısında quraşdırılacaq.
“Bakıda 30-dan çox yerdə Yeni il yolkaları qurulacaq. Qurulacaq yolkalar əsasən Avropa ölkələrindən gətiriləcək. Bundan başqa, Rusiya və Türkiyədən də yolkalar gətirilir”, - deyə Əliabbas Bağırov bildirib.
Bakı meriyasının rəsmisi deyir ki, bu bayram bir çox yeniliklər olacaq. Əsas yeniliklərdən biri də, bayram yolkalarının təbii olmasıdır. Əliabbas Bağırov deyir ki, təbii yeni il şamlarının istehsalı üçün xüsusi fermalar yaradılıb.
“Bu il əsasən təbii yolkalara üstünlük veriləcək. Bunun üçün Azərbaycanda xüsusi təbii yolla becərilən şam ağacları var. Onları satışda da görmək mümkün olacaq. Əsasən Quba, Şamaxı və Qəbələdə bunun üçün xüsusi fermalar fəaliyyət göstərir. Bu məhsulların həm qiymətləri sərfəli olacaq, həm də təbii olacaq. İnsan orqanizmi üçün xeyirli olacaq”, - deyə Əliabbas Bağırov bildirib.
Əliabbas Bağırov deyir ki,bayram ərəfəsində paytaxtın bir çox yerlərində, əhalinin sıx olduğu ərazilərdə xüsusi yeni il yarmarkaları, satış mərkəzləri yaradılacaq. Əsasən metro çıxışlarında və dayanacaqlara yaxın yerlərdə yaradılacaq satış mərkəzlərində satılan məhsullara xüsusi nəzarət təşkil ediləcək.
Həmin ərazilərdə satılan yeni il yolkaları və oyuncaqlarının keyfiyyətinin yoxlanılması üçün xüsusi nəzarət təşkil olunacaq. İqtisadiyyat və Sənaye Nazirliyinin mətbuat xidmətinin rəhbəri Abbas Əliyevin ANS PRESS-ə verdiyi məlumata görə, bayram öncəsi və bayram ərəfəsində nəzarət gücləndiriləcək.
“Yeni il ərəfəsində ən problemli məsələ uşaqların bayram hədiyyəsidir. Çünki bu hədiyyələrdəki şirniyyat bəzən vaxtı keçmiş və sağlamlığa təhlükəli olur. Onlara nəzarət son dərəcə çətindir. Bu işdə valideynlər də diqqətli olmalıdırlar. Övladlarına aldıqları hədiyyələrin içindəki qidaların vaxtına baxmlıdırlar. Hədiyyələrin saxlanma şəraitinə diqqət yetirməlidirlər. Hansısa qüsur aşkar olunduqda dərhal bizim “qaynar xətt”ə xəbər verilsə, saxtakarlıqla məşğul olanlarla mübarizə aparmaq daha rahat olar”, -deyə Abbas Əliyev bildirib.
Qurum rəsmisi onu da əlavə etdi ki, bəzi oyuncaqlar uşaqların orqanizmi üçün təhlükə törədə bilər.
“Bir çox istehlakçılar oyuncaq alarkən onun daha ucuz olmasına, iriliyinə, cəlbediciliyinə, uşağın istəyinə üstünlük verirlər. Lakin oyuncaq alarkən onun qeyd olunan əlamətləri ilə yanaşı, keyfiyyəti və uşağın sağlamlığına təsirini düşünmək lazımdır. Nəzərə alın ki, əsasən ucuz oyuncaqların istehsalında istifadə edilən xammalın tərkibində qeyd olunan zərərli maddələr ola bilər və bu təkcə uşağınızın sağlamlığı üçün yox, ətraf mühit üçün də təhlükəlidir. Ona görə də bu məhsulları seçərkən ilk növbədə onun sanitar-gigiyenik xüsusiyyətlərinə, uşaqda yarada biləcək psixoloji amillərə diqqət etmək lazımdır”, - deyə Abbas Əliyev əlavə edib.
Onun sözlərinə görə, uşaq oyuncağı alarkən onun üzərində olan etiket kağızına və ya yarlığa diqqət etmək lazımdır: “İstehlakçı həmçinin onu da bilməlidir ki, bu məhsullar məcburi sertifikatlaşmalı mallar sırasına daxil olduğundan, oyuncaq alarkən ticarət obyektindən həmin sənədləri tələb etmək hüququna malikdir. Gigiyenik və uyğunluq sertifikatları olmayan oyuncaqları almayın. Eyni zamanda nəzərə alın ki, oyuncaqlar fiziki baxımdan da sağlam olmalı, yəni uşağa xəsarət yetirmə ehtimalı olmamalıdır. Ucu iti formalı, əzilmiş, qırılmış oyuncaqların alınması məsləhət deyil. Xüsusilə, azyaşlı uşaqlar üçün oyuncaq alarkən oyuncağın materialına fikir verin”.(Anspress)
Ölkə.Az
