Axşam vaxtı paytaxtda ya marşrut olmur, ya da gec gəlir

Ölkə.Az xəbər verir ki, bu barədə Sherg.az-a axşam saatlarında bəzi sərnişindaşıma avtobuslarının vaxt intervalına əməl etməməsindən danışarkən nəqliyyat eksperti Fərhad Eyyubov deyib. 

O bildirib ki, hər bir marşrutun özünün pasportu deyilən bir göstəricisi var:

"Həmin marşrut pasportuna interval, sürücülərin işə çıxma və başlamaları yazılıb. Həmin pasportdakı göstəricilərə uyğun olaraq marşrutlar dispetçerlər tərəfindən idarə olunurlar. Hər bir marşrutun özünün müxtəlif interval vaxtı var. Ola bilsin ki, marşrutlar pik saatlarda qısa intervalla işləyirlər. Baxın, sürücü səhər saat 6-dan gecə saat 24:00 -a qədər işləyə bilməz. Onun iş rejimi çətindir. Gərək ki, iki sürücü işləsin. Amma elə marşrutlar var ki, iki sürücü işlətmir. Sürücü də öz iş vaxtını təqribi olaraq hesablayır. Bu nizamlamalar o marşrutları təşkil edən sahibkar tərfindən dəqiq yerinə yetirilmir".

Sərnişindaşımaların məqsədindən danışan F.Eyyubovun qənaətincə, həmin məqsədlər sahibkarlar tərəfindən başqa formada nəzərdə tutulur. Amma ictimaiyyət tərəfindən başqa baxış altında olur:

"Sərnişindaşımanın əssas məqsədi nədir ? Sərnişinləri mənzil başına sağ-salamat çatdırmaq. Sahibkarlar isə düşünür ki, biz sərnişinləri çatdırmalıyıq, ancaq iqtisadi cəhətdən səmərə də olmalıdır. Həmin marşrutu yalnız mənfəət əldə etməklə saxlaya bilərik. Bu məsələlər sahibkarlar tərəfindən analiz olunmadığı üçün müəyyən çətinliklər əməl gəlir. Baxın, "Baku Bus"ın belə çətinlikləri yoxdur. Amma elə marşrutlar var ki, bu sistemə nəzarət edə bilmir. Yəni sahibkarlar kəmiyyət göstəricilərindən keyfiyyət göstəriclərinə keçməlidir. Sahibkarlar isə buna keçmir. Kobud kəmiyyət göstəriclərinə üstünlük verir. Amma hər bir dayanacaqda intervala uyğun cədvəl tərtib olunur. Sərnişin bilir ki, avtobus neçə dəqiqədən sonra gələcək. Buna baxmayaraq intervala çox vaxt, çox yerlərdə əməl olunmur. Sərnişindaşımalarda bunlar çox böyük problemdir. 

Çünki mərkəzi formada idarə olunmur. Hər bir marşrut sahibi vəziyyətdən özünə uyğun şəkildə istifadə edir. Açıq deyim ki, hazırda Bakıdakı sərnişindaşıma prosesi təminatı ödəmir. Siz dediyiniz kimi, elə marşrutlar var ki, saat 22:00-dan sonra işləmir. Bunlar araşdırılmalıdır. Yəni hansısa sürücü xəstəlibsə o əvəz olunmalıdır. Ola bilsin ki, iş çətindir deyə bu saatdan sonra xəttə çıxmır. Belədirsə, həmin avtobusa iki sürücü ayrılmalıdır. İndi bu məslələrin hamısı sahibkarların ixtiyarındadır. Onlar sərnişinləri özlərindən incik salmamalıdır".

Bildirək ki, yuxarıda vurğuladığımız hallar daha çox 29, 96 və 199 saylı sərnişindaşıma avtobuslarında qeydə alınır.