Azərbaycanda 85 mindən çox qan donoru var

"Ölkə.Az"ın APA-ya istinadən xəbərinə görə, bunu Səhiyyə Nazirliyinin B. Eyvazov adına Elmi Tədqiqat Hematologiya və Transfuziologiya İnstitutunun direktoru Zöhrə Əlimirzəyeva deyib. O bildirib ki, hazırda ölkədə donorlar tərəfindən xəstə insanlar üçün kifayət qədər təhlükəsiz qan verilir və problemlər zamanla həll edilir.
 
Z. Əlimirzəyeva qeyd edib ki, xəstə insanları qanla təmin etmək üçün donorlara hər zaman ehtiyac var: “Sevindirici haldır ki, son illər qan verən donorların və tədarük olunan qanın miqdarı artıb. Belə ki, 2010-cu ildə qan verən donorların sayı 46 530 nəfər olmuşdusa, bu rəqəm 2016-cı ildə 85 803 nəfər təşkil edib. Respublika üzrə 2010-cu ildə 21 ton 131 litr qan tədarük edilmişdisə, 2016-cı ildə bu rəqəm 40 ton 327 litrə qədər yüksəlib. Bu da ölkədə donorluğun və qan xidmətinin inkişafını göstərir. Donorluq təkcə tibbi məsələ deyil, bu, milyonlarla sağlam insanların iştirak etdiyi sosial məsələdir”.