Fazil Mustafa: "İŞİD bizə nə qədər düşməndirsə, Hizbullah da o qədər düşməndir"

Qafqaz Müsəlmanları İdarəsinin sədri, Şeyxülislam Allahşükür Paşazadə İrana səfəri çərçivəsində bu ölkənin Ali Dini Lideri Ayətullah Xamenei ilə görüşüb. Görüşdə İslam aləmini təhdid edən problemlər müzakirə edilib.

Şeyxin İran səfəri, Xamenei ilə görüşü və apardığı müzakirələri millət vəkili Fazil Mustafa Ölkə.az-a şərh edib.

Fazil Mustafa: "Şeyxin səfərini yüksək bir addım kimi qiymətləndirirəm. Ən azı Azərbaycan dövlətinin İranla münasibətlərinin normal saxlanılması baxımından faydalıdır. Şeyxin də bu istiqamətdə müsbət faliyyəti var. Hesab edirəm ki, Şeyxin bu səfərini təzyiq forması kimi qiymətləndirmək olmaz. Azərbaycanda dünya görüşcə İranla yaxın olan dindar kütləsi də var. Dünya görüşücə yaxın olan adamların bir-biri ilə təmas saxlaması və fikir mübadiləsi aparmasını normal qəbul etmək lazımdır. Bütövlükdə İranın Azərbaycana qarşı bir sıra doğru olmayan fəaliyyətləri var ki, onların ortadan qaldırılması üçün müəyyən səylər göstərilməlidir. Şeyx də "Səhər" kanalı ilə bağlı fikirlərini açıq şəkildə bildirmişdi və bunun dostluq münasibətlərinə xələl gətirdiyini diqqətə çatdırmışdı. Çox güman ki, bu görüşd də Azərbaycan tərəfini narahat edən məsələlər İran tərəfinin diqqətinə çatdırılıb. Bu səfəri normal qarşılayıram. Bu səfərdə neqativ motivlər axtarmaq doğru deyil. Ən azından dindar diplomatiyası vastəsi ilə bəzi problemlərin çözülməsi ümumi işin xeyrinədir.

Azərbaycanda xeyli dindarlar var ki, İranın kəşfiyyat orqanlarına işləyirlər. Onlar ordan nə əmr alırlarsa onu da yerinə yetirirlər. Bu bir reallıqdır. Ancaq açıq fəaliyyət göstərən dini təşkilatların fəaliyyətinə bu istiqamətində şübhə salmaq doğru olmaz. Hər halda Şeyx Azərbaycan dövlətinin maraqlarını daha üstün tutan bir şəxsdir. Ola bilsin ki, Şeyxin özü ilə apardığı insanların içərisində İran kəşfiyyatına işləyənlər ancaq açıq şəkildə Azərbaycanın marağına qarşı hər hansısa bir addım atılması gözlənilən deyil. Bu səfəri bununla bağlamaq doğru deyil.

İŞİD bizə nə qədər düşməndirsə, İslamı nüfuzdan salan bir qurumdursa Hizbullahda eyni onun kimidir. Hizbullah da ermənilərə dəstək verən bir

qurumdur. Livanda da, burda da bu fəaliyyət ortadadır. Bizim hər iki tərəfdən zərbə aldığımızı nəzərə alaraq belə məsələlərin müzakirəsinin real olduğunu düşünmürəm. Çünki, İranın bu məsələdə siyasəti Azərbaycanın siyasəti ilə üst-üstə düşmür. İran burda həmdə müsəlman prinsipi ilə çıxış edən dövlət kimi qəbul olunmur. Çünki, ermənilər dəstək vermək bütün hallarda müsəlmanlıq prinsipi ilə uzlaşmır. Bəşər Əsədə dəstək vermək də həmçinin. Bəşər Əsəd şiə deyil, ələvidir. Ələvilərlə şiələrin arasında çox böyük bir uçurum var. Şiələr ələviləri qəbul etmirlər.

İŞİD-in Azərbaycana münasibətini biz nə qədər kəskin tənqid ediriksə, Hizbullahı da eyni dərəcədə tənqid edirik. Bu ikisini ayrı təsəvvür etmək olmaz".

 

Səxavət Məmməd

Ölkə.az