\"Mirzəyevçi\"lər Şirin Mirzəyevin anım günündə komandirlərini yalnız qoymadılar

Şirin Vəli oğlu Mirzəyev 1947-ci il yanvarın 5-də Xankəndində anadan olub. 1967-ci ildə Sankt-Peterburq Ali Siyasi Hərbi Məktəbini, 1988-ci ildə Hərbi Siyasi Akademiyanı bitirib. Uzun illər Sovet ordusunda xidmət edib. O, 1991-ci ildə Azərbaycanda ilk nizami özünümüdafiə taboru yaradıb. Alay komandiri kimi Ağdam rayonun müdafiəsində, ayrı-ayrı yaşayış məntəqələrinin erməni quldurlarından təmizlənməsində böyük qəhrəmanlıq göstərib.

Ş.Mirzəyev 1992-ci ilin iyunun 18-də Sırxavənd istiqamətində aparılan döyüşlər zamanı minaya düşərək həlak olub, iyunun 20-də isə Bakıda Şəhidlər Xiyabanında dəfn olunub. Ölümündən sonra o Azərbaycanın Milli Qəhrəmanı adına layiq görülüb.

Polkovnik-leytenant Şirin Mirzəyevin döyüş yolu ən ağır bölgələrdən keçib. Onun sərkərdəlik qabiliyyəti sayəsində Naxçivanik, Pircamal, Ağbulaq, Dəhraz, Fərrux, Qaraşlar, Bəşirli, Sırxavənd, Ballıqaya və digər kəndlər erməni quldurlarından azad edilmişdi. O, Ağdam rayonunun 120 kilometrlik cəbhə xətti ilə yanaşı, qonşu rayonların da bir sıra mühüm yaşayış məntəqələrinin erməni quldurlarından müdafiəsinə rəhbərlik edib. 

Xatırladaq ki, 18 iyun 1992-ci ildə Şirin Mirzəyevlə yanaşı 708 saylı briqadanın tank komandiri baş leytenant Qahir Hüseynov (Ölümündən sonra “Azərbaycan Bayrağı” ordeni ilə təltif edilib-red), 836 saylı alayın xüsusi təyinatlı zərbə hücum dəstəsinin komandiri leytenant Yavər Babayev, Mübariz və Araz Mirzəyevlər də (Hər ikisi Şirin Mirzəyev nəslinin nümayəndəsidir) şəhid olublar.

"Ölkə.Az" Şirin Mirzəyevin anım günündən hazırlanmış tədbirdən reportajı sizə təqdim edir:

Şirin Mirzəyevin anım gününə həsr edilmiş tədbirdə millət vəkilləri - Aqil Abbas, Adil Əliyev, Hadı Rəcəbli, Qənirə Paşayeva, Zahid Oruc, Fazil Mustafa, Qüdrət Həsənquiyev, QHT rəhbərləri, yazıçılar, şairlər, sənət insanları, keçmiş döyüşçülər iştirak edirdi. Tədbirdə eyni zamanda ötən ilin aprel döyüşlərində yaralanmış Qazilər də iştirak edirdilər.

Tədbirin aparıcısı isə Azərbaycanın ilk hərbi diktoru, vətənpərvərlik mahnılarının ifaçısı Şəmistan Əlizamanlı idi.

Tədbirdə Ş.Mirzəyev haqqında çəkilmiş “Diqqət, mən üç yüz birəm” filmi nümayiş olundu.

Azərbaycan Respublikası QHT-lərə Dövlət Dəstəyi Şurasının icraçı katibi Fərasət Qurbanov çıxış edərək Şuranın belə filmlərə dəstək verdiyini, bu yöndə fəaliyyət göstərən təşkilatların fəaliyyətini yüksək qiymətləndirdiyini bildirdi. O, Şuranın “Qarabağ qaziləri” ictimai birliyini Fəxri Diplomla təltif etdiyini deyib: “Qarabağ qaziləri birliyi daima Qarabağ əlillərinin problemlərinin həllinə dəstək olub, Azərbaycanda vətənpərvərliyin təbliğində ciddi işlər görüb. Elə bügünki tədbirin təşkilatçılarından biri də bu təşkilatdır”.

Fəxri Diplomu “Qarabağ qaziləri” İctimai Birliyinin sədri Ehtimad Əsədova təqdim edib.

Anım tədbirində Millət vəkili Aqil Abbas çıxış edərək belə tədbirlərin keçirilməsinin çox vacib olduğunu bildirib. Millət vəkili çıxışında Qarabağ müharibəsinə, ordu quruculuğuna və son aprel döyüşlərinə diqqət çəkdi. O, Qarabağ torpaqlarının tezliklə azad olunacağına əmin olduğunu bildirdi.

Şair Yusif Savalan çıxış edərək əfsanəvi komandirə həsr etdiyi şeiri səsləndirdi. Orta Məktəb şagirdi Fidan Məmmədova vətənpərvərlik ruhlu şeirlər söylədi. Şəmistan Əlizamanlı hərbi vətənpərvərlik mahnıları səsləndirdi.

Sonda Şirin Mirzəyevin xanımı, millət vəkili Flora Qasımova tədbirdə iştirak etdiklərinə görə hər kəsə minnətdarlığını bildirdi.

Şirin Mirzəyevin keçmiş silahdaşları özlərini "Mirzəyevçilər" adlandırır. "Mirzəyevçi"lər Şirin Mirzəyevin anım günündə komandirlərini yalnız qoymadılar.

Səxavət Məmməd
Fotolar: Elmar Məliksoy
Ölkə.Az