“Azərbaycandan yeddi səda”

“Porgy & Bess” layihə meneceri Naima Maziç musiqiçiləri təqdim edərkən qeyd edib ki, Vyananın ən tanınmış caz məkanı olan bu klub daim qeyri-adi ifaçılıq qabiliyyətinə malik musiqiçilərlə əməkdaşlıqda maraqlıdır və onlar Azərbaycan caz sənətini cazsevərlərə təqdim etməkdən məmnundurlar. O, bu konsertin baş tutmasında göstərdiyi əməkdaşlıq və dəstəyə görə Azərbaycan Mədəniyyət Mərkəzinə təşəkkür edib.

Layihə barəsində məlumat verən R. Sultanov Azərbaycanın dünyanın ən gözəl təbiətə malik ölkələrindən biri olduğunu deyib. O qeyd edib ki, daim əsrarəngiz təbiətə malik ölkəsinin bütün bu gözəlliklərini musiqinin dili ilə tərənnüm etmək arzusunda olub. Bu ideyanı musiqiçi dostları ilə bölüşüb və onlar Azərbaycanı bölgə-bölgə, diyar-diyar gəzərək, Azərbaycan təbiətindən ilham aldıqdan sonra yeddi musiqi əsərini ərsəyə gətiriblər. O, qeyd edib ki, hər biri Azərbaycanın müxtəlif bölgəsində bəstələnən əsərin öz tarixçəsi var və hər biri Azərbaycan təbiətinin fərqli bir mövzusuna həsr olunub.

Konsertdə Rain Sultanovu Elçin Şirinov (piano), Aleksey Miltix (çello), Yasuhito Mori (kontrabass), Peter Nilsson (zərb alətləri) müşayiət ediblər.

Qeyd edək ki, “Azərbaycandan yeddi səda” layihəsi 2013-cü ilin noyabrında Norveçdə “Rainbow” studiyasında diskə yazılsa da, layihənin tamaşaçılar qarşısında ilk təqdimatı Vyanada baş tutan konsertdə olub.(Anspress)

Ölkə.Az