İlahiyyatçı: "Qaraçuxur məscidinin yandırılması ölkəni qarışdırmaq cəhdidir"

Bakının Qaraçuxur məscidinin yandırılması ölkədə geniş rezonans yaratdı. Müxtəlif versiyalar irəli sürüldü, hadisənin arxasında radikal qrupların olduğu haqda mülahizlər yürüdüldü.

Hadisə ilə bağlı Ölkə.az ilahiyatçı Elşad Mirinin fikrini öyrənib:

Elşad Miri: "Son dövrdə baş verən hadisələr buna əsas verir ki, hansısa qruplar ölkəni qarışdırmaq istəyir. Polis orqanları bununla bağlı konkret bir nəticəyə gəlmədən dəqiq nə isə demək olmur. Məscidin yandırılması ölkədə dini tolerantlığı pozmaq üçün ola bilər. Qaraçuxur məscidində bir neçə dini məzhəblərin nümayəndələri ibadət edirdi. Bu hadisəni törədib, sonra onu orada ibadət edən müxtəlif məzhəblərin üzərinə atmaq istəyirlər. İranla dövlətimizin münasibətlərində müəyyən istiləşmə var. Məsciddə yanğın törədərək hadisəni İrana yaxın qüvvələrin üzərinə ataraq münasibətlərin soymasına çalışmaq istəyə də bilərlər. Müəyyən şəxslər bunu edərək Suriya, İraq məsələsi ilə bağlı dövləti ora yönləndirmək də istəyə bilər. Suriyaya gedənlərlə bağlı o məscidin adı çox çəkilir, yanğını törədib hadisəni onların üzərinə atmaq da istəyə bilərlər.

Faktiki olaraq biz görüntülərə baxanda, məscidi yandırmaq istəyən şəxsin davranışından hiss olunur ki, o, insanları nəyəsə oyandırmaq istəyir. Əgər onun məqsədi insanlara ziyan vurmaq olsa idi, camaatın gur vaxtında bu hadisəni törədərdi, necə ki, "Əbu Bəkr" məscidində bunu etdilər. Dövlət bu məsələ ilə əlaqəsi olan bütün şəxsləri dərhal həbs etməlidir.

Deyirlər ki, o məsciddə də ibadət dayandırılacaq. Əksinə orda ibadəti dayandırmaq düzgün deyil. "Əbu Bəkr" məscidinə əl bombası atılandan və orda bir nəfər həlak olandan sonra o məscid hələ də bağlıdır. Məhkəmə keçirilsə də, günahkarlar cəzalandırılsa da, bu günə qədər həmin məscidin qapısını bağlı saxlayıblar. "Şəhidlər" məscidinin də qapısı bağlıdır. Guya məscidi təmir edəcəklər amma bu günə qədər də orda təmir getmir. "Şəhidlər" məscidi Azərbaycanın ən təmirli məscididir. Bu hadisə də rəvac verməməlidir ki, Qaraçuxur məscidi də bağlansın. Bu məsələni ümumiləşdirib, əksinə məscidi bağlamaq yerinə, məscidi ibadət edənlərin üzünə açıb, ölkəni qarışdırmaq istəyənlərə mesaj verməliyik ki, "Hər nə olsa da biz ayaq üstəyik". Əks halda bu cür yanaşma dövlətlə dindarlar arasında anlaşılmazlıqlara gətirib çıxaracaq.

- Bir neçə gündür ki, Şeyx İrandadır, bu hadisənin həmin ərəfədəsində baş verməsi nə ilə əlaqədar ola bilər?

- Təkcə bu məsələ deyil. İran prezidenti Həsən Ruhani Azərbaycana gələn kimi Sumqayıtda məscid kimi fəaliyyət göstərən yeri bağladılar və müəyyən şəxslər həbs edildi. İndi də Şeyxin İran səfəri sonrası belə bir hadisə baş verdi, bunu . Mən qorxuram ki, bu hadisəni həmin o insanların üzərinə ataraq ölkədə "İŞİD-çilər, saqqalılar"la bağlı yeni, yalnış bir fikrin formalaşdırmaq istəsinlər. Hər şey ortadadır, bəzi qüvvələr ölkəni qarışdırmaq istəyir. Bu məsələ artıq reallığa çevrilib və düşünürəm ki, diqqətli olmaqda fayda var".

Səxavət Məmməd
Ölkə.az