Beytulla Hüseynov MTN generallarının məhkəməsində ifadə verdi

"Ölkə.Az" xəbər verir ki, S. Qurbanovun vəkili İlkin Mustafanın APA-ya verdiyi məlumata görə, iclasda şahid qismində Bakı Telefon Rabitəsi İstehsalat Birliyinin həbsdə olan sabiq baş direktoru Beytulla Hüseynov ifadə verib. B. Hüseynov zərərçəkmiş Ağaisa Mahmudovun dediklərini təkzib edib. Bildirib ki, A. Mahmudovun barəsində danışdığı ev ona yox, bacısına məxsus olub.
 
Proses iyulun 4-də davam edəcək.
 
İş adamı Mahmudov Ağaisa Əflatun oğlu istintaq zamanı ifadəsində göstərib ki, 2002-ci ildən etibarən sahibkarlıq fəaliyyəti ilə əlaqədar “Bank of Azerbaijan” ASC-nin müştərisi olub: “Həmin bankın 1 saylı filialının müdiri Ələddin İbrahimovla münasibətlərim yarandı, təxminən 2012-ci ilin əvvəllərində Ələddin İbrahimov mənə zəng vuraraq bir nəfər müştərinin Bakı şəhəri, C.Hacıbəyli küçəsində yerləşən həyət evini banka girov qoyaraq kredit götürdüyünü, hazırda kreditlərini ödəyə bilmədiyi üçün evini satmaq istədiyini bildirdi. Həmin evə baxıb bəyəndim. Vaqif adlı şəxslə tanış oldum, o, özünü evin sahibi kimi təqdim elədi. Bir neçə gün sonra Ələddinin iştirakı ilə Vaqiflə “Bank of Azerbaijan” ASC-nin 1 saylı filialında görüşdük, görüş zamanı Vaqif evin ona məxsus olduğunu dedi. Evi 823.000 manata satmağa dair razılığa gəldik. Mən Vaqifə 423.000 manat pul verdim və Vaqifin banka olan kredit borcunu ödədim. Bir neçə gün ərzində Vaqifə təxminən 380.000 manat pulu hissə-hissə verdim, qalan hissəni isə sonra verəcəyimi dedim, işlərimlə əlaqədar Rusiyaya getdim”.
 
Zərərçəkən şəxs qeyd edib ki, təxminən 2013-cü ilin payız aylarında Bayram adlı bir nəfər şəxs onun ofisinə gələrək Ceyhun Hacıbəyli küçəsi 119 ünvanında yerləşən evi kimdən və neçəyə aldığı ilə maraqlanıb: “Mənə dedilər ki, ev  Rabitə və Yüksək Texnologiyalar Nazirliyinin Bakı Telefon Rabitəsi İstehsalat Birliyinin baş direktoru Beytulla Hüseynova məxsusdur. Həmin hadisədən təxminən 1 il sonra, yəni 2014-cü ilin payız aylarında özünü MTN əməkdaşı kimi təqdim edən Rüfət adlı şəxs mənə zəng vurdu,  məni MTN-ə dəvət etdi. MTN-ə gedərək Rüfət adlı əməkdaşla görüşdüm, ona Beytulla Hüseynovun Vaqif və Murad adlı şəxslərin onu aldadaraq C.Hacıbəyli küçəsində yerləşən evini satması barədə ərizə yazdığını, bu məsələnin araşdırılmasının Eldar Mahmudov tərəfindən baş idarə rəisi Sübahir Qurbanova tapşırıldığını, Sübahir Qurbanovun da məsələni Beytullanın xeyrinə həll etməklərini tapşırdığını bildirərək onların heç nə edə bilməyəcəklərini söylədilər. Mən də baş verənlərlə bağlı ətraflı izahat yazıb getdim. Təxminən 1 ay sonra Rüfət yenidən  zəng vuraraq məni MTN-ə dəvət etdi,  “Sultan” kafesində görüşüb söhbət etdik, oradan ayrılıb getdikdən bir neçə gün sonra, 2014-cü ilin sonlarında Rüfət yenidən zəng vuraraq məni nazirliyə çağırdı, nazirliyə getdikdə giriş qapısının yanında olan qəbul otağının ikinci mərtəbəsində hündür boylu, bığlı, orta bədən quruluşlu, özünün deməsinə görə Zabratda yaşayan bir şəxs məni qəbul elədi. Həmin vaxt Vaqif də orada idi, orada evlə bağlı Vaqiflə mübahisə yarandı, Vaqif həmin MTN əməkdaşına məndən 423 min manat pul aldığını, həmin pulu da Beytulla Hüseynovun Mehbalı adlı qohumuna verdiyini etiraf etdi. MTN əməkdaşı baş idarə rəisinə məruzə edəcəyini bildirib nazirliyin inzibati binasına gedib təxminən 1 saat sonra qayıdaraq,  mənim vicdanlı alıcı olduğumu, lakin Beytulla Hüseynovun Eldar Mahmudovla qohum olduğu üçün evin Beytullaya qaytarılması ilə bağlı Sübahir Qurbanovun təkid etdiyini bildirdi. Həmin ərəfələrdə Ələddin mənə müraciət edərək özünü sığortalamaq üçün evi bankın işçisinin adına rəsmiləşdirməyi təklif etdi, mənim razılığımdan sonra ev bankın işçisi olan İmran Abdullayevin adına rəsmiləşdirildi”.
 
Ağaisa Mahmudov bildirib ki, 2015-ci ilin aprel ayında MTN-də işləyən, əvvəlcədən tanıdığı Natiq Alıyev zəng vurub onu “Sultan” restoranına dəvət edib: “Görüşə Fizuli Əliyev də gəldi, söhbət zamanı Fizuli ilə Natiq mənə Beytullanın ev məsələsinin həll olunmasının  Eldar Mahmudov tərəfindən onlara tapşırıldığını, Sübahir Qurbanovun hər gün onları danladığını bildirdi. Evdən çıxmalı olduğumu və evi Beytullanın adamlarından birinin adına rəsmiləşdirməli olduğumu dedi. Mən Natiq və Fizuliyə evdən çıxmayacağımı, pulunu verib ev aldığımı, Beytullanın da digər şəxslərdən pulunu almalı olduğunu söylədim. Həmin hadisədən təxminən 3-4 gün keçəndən sonra Natiq Alıyev zəng vuraraq bir nəfər cinayətkar saxladıqlarını, həmin şəxsin mənim adımı çəkdiyini bildirib nazirliyə çağırdı. MTN-in qəbul otağının ikinci mərtəbəsində Natiq Alıyevlə görüşdüm. Qəbul otağında Mais adlı tanışımın da orada olduğunu gördüm. Mais mənə xaricdən araq qapağı gətirdiyi üçün saxlanıldığını dedi. Mais əvvəllər mənə həmin araq qapaqlarından satıb, Natiq də mənə istehsal etdiyim araqları saxta aksizlə satdığımı bildirdi, cinayət məsuliyyətinə cəlb olunmamağım üçün məndən 200.000 manat pul istədi. Mən isə  Natiqə saxta aksiz markalarından istifadə etmədiyimi desəm də, razılaşmayacağım təqdirdə Maisi mənim üzümə qoyub vəziyyətimin daha da pis olacağını söylədi. Bundan sonra  Natiqlə 50.000 ABŞ dollarına razılaşdım, pulun danışılması prosesində Fizuli də iştirak etdi. Oradan çıxdıqdan bir neçə gündən sonra 50.000 ABŞ dolları pulu 15.000, 25.000 və 10.000 ABŞ dolları olmaqla 3 dəfəyə “Sultan” kafesində Fizulinin yanında Natiqə verdim. Pulları vermək üçün “Sultan” kafesinə gedəndə hər dəfə dostum Adil Budaqovu da özümlə aparırdım, o, maşında
gözləyirdi”.
 
Zərərçəkən şəxs istintaqa ifadəsində qeyd edib ki, pul verəndən   sonra 2-3 ay evlə bağlı onu heç kim narahat etməyib: “2015-ci ilin iyul ayının əvvəllərində Natiq mənə zəng vurub təcili MTN-ə gəlməyimi tapşırdı. Natiqlə “Sultan” kafesində görüşdük. Görüş zamanı Natiq MTN nazirinin eləcə də, şöbə rəisinin sərt şəkildə ona tapşırıq verdiyini, evin qısa müddət ərzində Beytulla Hüseynova qaytarılmalı olduğunu bildirdi. Mən yenə də buna etiraz elədim. Natiq məsələnin son dərəcə ciddi olduğunu, onlarla razılaşmayacağım təqdirdə bütün əmlaklarımın əlimdən alına biləcəyini, məsələ ilə bilavasitə Eldar Mahmudovun və Sübahir Qurbanovun məşğul olduğunu bildirdi. Bir qədər sonra Fizuli də bizim yanımıza gəlib Natiqin dediklərini təkrarladı.
 
Bir neçə gün sonra Natiq yenə  zəng vuraraq Ələddinin MTN-də olduğunu dedi və telefonu Ələddinə verdi. Ələddin MTN-dən çıxandan sonra görüşməyi planlaşdırdıq. Onlar həmin gün Ələddinlə görüşərək evi qaytarmaq barədə razılığa gəlmişdi, daha sonra Natiqlə yenidən görüşüb evin girovdan çıxarılması üçün banka 300.000 manat əsas borc, 218.000 manat faiz borcunun ödənilməli olduğunu, o cümlədən əsas borcun mənim tərəfimdən, faiz borcunun isə Ələddin tərəfindən ödənilməli olduğunu dedilər. 2015-ci ilin iyul ayının 20-də 300.000 manat pulu MTN-nin yaxınlığında yerləşən “Naxçıvan” restoranında Natiqə verdim, pulu apararkən dostum Adil Budaqov və işçim Azər Cəlalov da mənimlə  getdi. Pulu Natiqə verdikdən bir qədər sonra Fizuli də oraya gəldi. Onlar pulu banka ödəyib evi girovluqdan çıxaracaqlarını, eyni zamanda banka ödəniləcək faizləri Ələddinin ödəməyə razılıq verdiyini bildirdilər. Mən 300 000 manatı Natiqə verən zaman ondan Beytulla ilə danışıb evdən bir qədər gec çıxmağıma dair razılıq almasını xahiş elədim. Natiq də məzuniyyətə çıxdığını bildirərək, həmin məsələni qayıdandan sonra həll edəcəyinə dair söz verdi.
 
Bir neçə gün sonra Ələddin zəng vurub evin banka olan borc və faizlərinin ödənildiyini, evin Beytullanın qohumu olan Tariyel Zamanovun adına rəsmiləşdirildiyini dedi. Təxminən 2015-ci ilin avqust və ya sentyabr ayında Natiq Alıyevin təşkilatçılığı ilə Beytulla ilə Alov qüllələri kompleksinin birinci mərtəbəsində yerləşən restoranda görüşdük. Görüş zamanı  Beytulladan təmir üçün çəkdiyim 250.000 manat pulu qaytarmasını tələb etdim. Beytulla isə mənə heç bir məbləğdə pul verməyəcəyini bildirdi, bu işə görə əsəblərinin korlandığını, Eldar Mahmudova 100.000 manat pul verdiyini dedi. Mən həmin evi pul verib aldığımı, evin haqsız yerə hədə-qorxu ilə əlimdən alındığını desəm də, Beytulla mənə olanların arxada qaldığını, 2016-cı ilin yanvar ayının 10-dək həmin evdə qalmağıma icazə verdiyini dedi. O, mənə “2-3 aya kimi gör biz kim olacağıq” ifadəsini işlədib sağollaşıb getdi”.
 
Zərərçəkən qeyd edib ki, bu hadisədən bir müddət sonra Fizuli, Natiq və Vaqif “Sultan” kafesində görüşüb. Görüş zamanı Fizuli ilə Natiq evin tam pulunu, yəni 823.000 manatı ona qaytarmağı Vaqifdən tələb edib: “Vaqif əlində nağd pulunun olmadığını bildirdikdə, Natiqlə Fizuli əmlakları onların adlarına keçirməsini tələb etdilər. Vaqif də əmlakların sənədlərinin qısa müddət ərzində hazır olacağını və ondan sonra əmlakları onların adına keçirəcəyinə söz verdi, hətta pulun bir qisminin əvəzinə un da verəcəyini bildirdi. 17 oktyabr 2015-ci il tarixdə Eldar Mahmudovun vəzifədən azad edilməsindən sonra Natiq Alıyev, Fizuli Əliyev və Beytulla Hüseynov həbs olundu, mən  da bundan sonra İmran Abdullayev vasitəsi ilə evin Tariyel Zamanova satılması ilə əlaqədar bağlanmış müqavilənin ləğv olunması barədə məhkəmədə iddia qaldırdım və Xətai rayon məhkəməsinin qərarı ilə həmin evin alqı-satqı müqaviləsi ləğv olundu”.
 
İttihama əsasən, təqsirləndirilən şəxslər 2004-2015-ci illərdə mütəşəkkil dəstə tərkibində xidməti vəzifələrinin icrası ilə əlaqədar hakimiyyətdən və öz qulluq mövqelərindən sui-istifadə ediblər.
 
Dəstə üzvlərinin sahibkarların psixi və fiziki zorakılıqlara məruz qalmaqla xəsarətlər almaları, sərbəst buraxılmaları müqabilində tələb olunan vəsaitin əldə olunması üçün ayrı-ayrı şəxslərə və kommersiya banklarına qarşı külli miqdarda borc və kredit öhdəliklərinin yaranması kimi ağır nəticələrə səbəb olan, özlərinin və yaxın qohumlarının şəxsiyyəti üzərində zor göstərmə, tutma, həbsə alma və barələrində rüsvayedici məlumatlar yayma hədəsi ilə fiziki və psixi təsirlər göstərilməklə 162 zərər çəkmiş şəxsin ümumilikdə 18 milyon 437 min manat, o cümlədən 6 milyon 449 min manat məbləğində külli miqdarda pul vəsaitlərini, 5 milyon 693 min manat dəyərində zərgərlik məmulatları və daşınmaz əmlaklarını quldurluq və hədə-qorxu ilə tələb etməklə ələ keçirmələrinə, 5 milyon 295 min manat məbləğində nağd pul vəsaitlərini rüşvət kimi almalarına, həmçinin dövlət büdcəsindən xidməti vəzifələrinin icrası üçün ayrılmış 1 milyon manat məbləğində pul vəsaitlərini vəzifə saxtakarlığı ilə mənimsəmələrinə dair şübhələr müəyyən olunub.
 
Zərərçəkmiş şəxslərə vurulmuş ziyanın ödənilməsinin təmin olunması üçün məhkəmə qərarları əsasında təqsirləndirilən şəxslər Sübahir Qurbanov, Füzuli Əliyev, Zaur Məmmədov, Natiq Alıyev, Teymur Quliyev, Natavan Mirvətova və qeyrilərinə məxsus ümumilikdə 21 milyon 528 min manat dəyərində əmlak və pul vəsaitlərinin, o cümlədən 20 milyon 971 min manat dəyərində daşınmaz əmlak, 272 min manat dəyərində nəqliyyat vasitələri, 42 min manat dəyərində zərgərlik və digər qiymətli məmulatlar, 88 min manat, 88 min ABŞ dolları və 5 min Avro nağd pul vəsaitləri üzərinə həbslər qoyulub.
 
Onlara Cinayət Məcəlləsinin 145.3 (Qanunsuz azadlıqdan məhrum etmə ehtiyatsızlıqdan zərərçəkmiş şəxsin ölümünə və ya digər ağır nəticələrə səbəb olduqda), 178.3.1, 178.3.2 (dələduzluq mütəşəkkil dəstə tərəfindən külli miqdarda ziyan vurmaqla törədildikdə), 179.3.1, 179.3.2 (Mənimsəmə və ya israf etmə mütəşəkkil dəstə tərəfindən külli miqdarda törədildikdə), 181.3.1, 181.3.2 (Quldurluq mütəşəkkil dəstə tərəfindən külli miqdarda əmlak əldə etmək məqsədi ilə törədildikdə), 182.3.1, 182.3.2 (Hədə-qorxu ilə tələb etmə külli miqdarda əmlak əldə etmək məqsədi ilə törədildikdə ), 228.4 (Qanunsuz olaraq qaz silahını, soyuq silahı, o cümlədən soyuq atıcı silahı əldə etmə, satma və ya gəzdirmə), 302.1, 302.2 (Gizli qaydada informasiya alınması üçün nəzərdə tutulmuş texniki vasitələrdən istifadə edilməklə əməliyyat-axtarış fəaliyyəti haqqında qanunvericiliyi pozma), 311.3.1, 311.3.2, 311.3.3, 311.3.4 (Rüşvət alma qabaqcadan əlbir olan bir qrup şəxs və ya mütəşəkkil dəstə tərəfindən hədə-qorxu tətbiq olunmaqla külli miqdarda və təkrar törədildikdə), 313 (Vəzifə saxtakarlığı), 320.1, 320.2 (Rəsmi sənədləri saxtalaşdırma və bilə-bilə saxta sənədlərdən istifadə etmə), 341.2.1, 341.2.2 və 341.2.3-cü (Bir qrup şəxs tərəfindən silah tətbiq olunmaqla hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə ağır nəticələrə səbəb olduqda) maddələri ilə ittihamlar irəli sürülüb. Onların barəsində cinayət işi ayrıca icraata verilib