Bu gün Milli Məclisin növbədənkənar iclası keçiriləcək

“Ölkə.Az”-ın məlumatına görə, iclasın gündəliyinə Ali Məhkəməyə, Bakı, Gəncə, Sumqayıt, Şirvan və Şəki Apelyasiya məhkəmələrinə hakimlərin təyin edilməsi, Su Məcəlləsinə, Miqrasiya Məcəlləsinə, "Azərbaycan Respublikasının 2017-ci il dövlət büdcəsi haqqında", "İcra haqqında", "Məişət zorakılığının qarşısının alınması haqqında", "Reklam haqqında", "Dövlət rüsumu haqqında" və digər qanunlara əlavə və dəyişikliklər olmaqla, 16 məsələ daxildir.

Bununla da 2017-ci ilin yaz sessiyası ərzində parlament 13-cü plenar iclasını keçirmiş olacaq. 

Yaz sessiyası ərzində ümumilikdə gündəliyə 278 məsələ daxil edilib. Bir çox qanunlar qəbul olunub və bəzilərinə isə əlavələr, dəyişikliklər edilib.

Milli Məclisin daxili nizamnaməsinə müvafiq olaraq millət vəkilləri iyul ayının 15-dən tətilə çıxmış hesab olunurlar.

Milli Məclisin Daxili Əsasnaməsinə əsasən sentyabrın 15-dən komitə iclasları başlayacaq. Bununla da parlamentin payız sessiyası öz işinə start verəcək. Sentyabrın 30-dan isə plenar iclaslar başlayacaq.