Jurnalistin faktı olmayanda...

"Ölkə.Az" Azər Hüseynbalanın məqaləsini təqdim edir

...Bu cütlük bir az hiyləgərcəsinə davrana bilsəydi, Ramil Asabovu da kök və cüssəli formada montaj etdirə bilərdi. Məsələn, Mahmudun şəkillərindən görünür ki, kökdür. Bu Ramilin başını Mahmudun bədəninə montaj edə bilərdilər... heç olmasa onda bir az inandırıcı görünərdi... Bu barədə sonra.

Aşığın sözü qurtaranda “dalay-dalay” deyər, zərbi-məsəldir və hər zaman aktualdır. Bu “dalay-dalay” məsəli həm də ona görə aktualdır ki, jurnalistikada da sözü... həm də faktı qurtaranlar, yaxud heç olmayanlar var.

Polis mundirini əynindən çıxarıb üzünü jurnalistikaya deyil, zurnalistikaya tərəf çevirən Mahmud Tağıyev və onun ətrafında züy tutanlar kimi...

Keçmiş polis işçisində “əli ətə çatmayan pişik” kimi hədəfə aldığı bir neçə dövlət qurumuna, özəl şirkətə və bu qurumların rəhbərliyinə qarşı kin-küdurətin haradan qaynaqlandığı bəllidir, reketçilik. Atır da, tutdusa-tutar. Mahmud Tağıyev də, özünü ələkçinin qıl verəni kimi aparan Araz Məmmədov da öz amacları ilə kim bilir neçənci “qara siyahı”larının peşindədirlər... Amma artıq “tutdusa-tutar” əmələ gəlmir.

İctimaiyyət ayaqdadır, jurnalistlər isə maşallah, sökürlər onları.

Zəruri xatırlatma: qafqaznews.az, kafkaznews.az, 365info.az, legion.az və sair xisləti məlum çetenin zaman-zaman öz qara siyahılarındakı obyektlərə necə hücum çəkdikləri haqda kifayət qədər fakt əldə etsəm də, hələ ki bunları bir qırağa qoyuram... Hələlik fikirləşmək üçün bir faktı deyirəm ki, artıq 365info.az-ın redaktoru, Mahmudun daha bir əlaltısı Anar Asimoğlu tutulmaq, yəni şantaj və reketçiliyinə görə həbsə alınmaq üzrədir. Ruslar demiş, “daiqralsa”. Hələ utanmaz-utanmaz ölkə rəhbərliyinə də müraciət edir...

Amma “podoş” üzləri var ki, cilddən-cildə girirlər. Mən və digərləri açıq-açığına bu soyğunçuların üstünə gedəndən, onları müasir reket zurnalistikasının (bundan sonra belə adlanacaqlar) daha öncülləri kimi tanıdandan bəridir özlərini aydan arı, sudan duru təqdim etmək üçün çabalayırlar. Adı üstündə olanın, daha doğrusu, alnına yazılanın bəraətə gedən yolu çoxdan bağlanıb. Mahmud Tağıyev və Araz Məmmədov isə ayıblarına kor olmaq əvəzinə, qarışqadan fil düzəltməyə həvəsləniblər. Olsun, mən onları qınamıram, çünki “yolçu yolda gərək” deyib nə qədər irəli getməyə çalışırlarsa, daha betər özlərini ifşa edirlər və batırlar.

Sən demə, bu Mahmud Tağıyevin keçmişi də aydan arı, sudan duru olmayıb. Özünü indi jurnalistika sahəsinə sırımağa çalışan sayt rəhbəri vaxtilə qanun keşikçisi olub. Lakin bu orqandan nədənsə qovulubmuş... Hər şey bəllidir, deyilmi?

Mətləbdən uzaqlaşmayaq. Adlarını çəkdiyim saytlarda iki gün öncə Zaqataladan daha bir qərəzli, tamamilə saxtalaşdırılan məlumat verilib, hətta etnik zəmində qarşıdurma yaratmaq məqsədi güdən bir detala da toxunulub.

Həmin məlumatda Katex kənd sakininin “əlində” guya Zaqatala-Balakən ərazisində nadir növdən sayılan və adı “Qırmızı kitab”a düşən öldürülmüş piton ilanı ilə çəkilən şəkli də verilib. Burda bişmiş toyuğun gülməyi tutur. Öncə bu savadsız və kütbeyinlərə, jurnalist adına və jurnalist savadına qara ləkə sayılan zurnalist - reketçilərə öyrədim ki, Azərbaycan faunasında əslində belə bir növ yoxdur... (Utanın, dövlət məmuru, ETSN-nin sektor müdiri sizə məntiqli və araşdırılmış məlumat verib, amma sizlər yenə şantajınızdan əl çəkməmisiz.)

İkincisi, təcrübəli herpetoloq, biologiya üzrə fəlsəfə doktoru Təvəkkül İskəndərovdan öyrəndim ki, şəkildəki arid ərazilərin gürzəsidir, ən böyük növünün ölçüsü 120 santimetr olur. Bir daha bu saxtakar çetenin çirkin əməlləri və iç üzü görünür.

Üçüncüsü, özünü “peşəkar” adlandıran bu “savadlılar” montaj zamanı o qədər “peşəkarlıqlarına” aludə olublar ki, dövlət qurumuna qarşı 2-3 ittihamı birdən uydurmaq üçün şəkildəki ilanı bəsit formada, bir sözlə, az qala əjdaha boyda böyütməkdən də vaz keçməyiblər. Bu da azmış kimi, “o boyda ilan”ın arxasında da montaj yolu ilə odun yüklü bir maşın yerləşdiriblər...

Dördüncüsü, Mahmudla Araz bir-birinə qoşulub o qədər “peşəkarlaşıblar” ki, guya öldürülən pitonu heç olmasa canlı-cüssəli bir adamın əlində montaj etməyi unudublar. Pitonun çəkisinin nə qədər olduğu təxminən piton ilanı haqda məlumata malik hər kəsə bəllidir. Lakin bu Mahmudla Araz son günlər ifşa olunduqdan sonra elə vəziyyətə düşüblər ki, adi bir nüansı belə unudublar. Ay sizi “peşəkarlar”.... Onların böhtançı və şantajçı olduğunu yenədəmi sübut etməyə ehtiyac var?

Şəkildə möhtəşəm görünüşlü pitonu guya bir əlində göyə qaldıran cılız oğlana gəldikdə isə, bilmirəm təsadüfdürmü ya xoşbəxtlikdirmi, Şəkidə idim, fürsət tapıb həmin şəkildəki oğlanın Balakən rayonu, Katex kənd sakini Ramil Asabov olduğunu öyrəndim. Öyrəndim ki, çay kənarında ölmüş vəziyyətdə tapdığı nazik, 1 metr uzunluğundakı ilanı Ramil həqiqətən də balaca bir çubuqla əlinə götürərək şəkil çəkdirib. Lakin bu savadsız kütbeyinlər hansısa məqsədlə şəkli montaj edərək balaca ilanı bəsit formada böyüdüb, oğlanın arxasına isə odun dolu maşın yerləşdirib.

Ay polisdən qovulan! Axı, sən yaxşı bilməlisən peşəkarcasına şər-böhtan atmağı, montaj etməyi, qondarma dəlillər düzəltməyi? Əcəba, o peşəkarlığını itirmisən, yoxsa? Bəlkə, elə bu bacarıqsızlığın üzündən qovulmusan polisdən?

Bu cütlük bir az hiyləgərcəsinə davrana bilsəydi, Ramil Asabovu da kök və cüssəli formada montaj etdirə bilərdilər. Məsələn, Mahmudun şəkillərindən görünür ki, kökdür. Bu Ramilin başını Mahmudun bədəninə montaj edə bilərdilər... heç olmasa onda bir az inandırıcı görünərdi.

Pitonu Azərbaycan faunasına xas sürünən kimi qələmə vermək müasir reketçi Zurnalistikanın peşəkarları olanların qeyri-peşəkarlığının, savadsızlığının və ölkənin faunasından xəbərsizliyinin sübutudur. Ay camaat, Mahmudla Arazın məqsədi bir daha bəlli oldumu? Bu “peşəkar” cütlük saxtalaşdırılmış məlumatları məqsədli şəkildə qəsdən yayaraq bir daha reket peşəkarlığı ilə nəsə umurlar. Lakin məqsədləri puç olanda dövlət qurumlarının, konkret halda ETSN-nin və onun əməkdaşlarının ünvanına qara yaxır, şantaj xarakterli, həqiqətdən tamamilə uzaq məlumatlar yaymaqdan da çəkinmirlər... Siz nə qədər “həyasız” imişsiniz...

P.S. Bu saytlarla bağlı başqa yerlərdən mənə bir neçə nəfər müraciət edib. İndi Şəkidəyəm, onlarla görüşməyə vaxtım yoxdur. Sağlıq olsun, məncə, bu Mahmud və Araz xəmiri hələ çox su aparacaq...