Ermənilərin yaraladığı qadın təcili əməliyyat olundu

Ötən gün düşmən təxribatı nəticəsində yaralanan Füzüli rayonunun Alıxanlı kənd sakini Sərvinaz Quliyevanın vəziyyəti normaldır.

"Ölkə.Az" xəbər verir ki, bu barədə azvision.az-a Füzuli Rayon Mərkəzi Xəstəxanasının baş həkimi Natiq Şükürov məlumat verib.

Baş həkim qeyd edib ki, S.Quliyeva təcili əməliyyat olunub və hazırda vəziyyəti stabildir.

“Xəstə həkim nəzarətindədir. Müalicələri davam edir. Bakıdan həkim çağırmağa ehtiyac bilmədik. Dünən cərrahlarımız tərəfindən təcili əməliyyata alındı. Xəstə təxminən bir həftəyə yaxın burada qalacaq. Müalicə tam başa çatdıqdan sonra evə buraxılacaq".

Qeyd edək ki, iyulun 4-də saat 20:40 radələrində Ermənistan silahlı qüvvələri tərəfindən Füzuli rayonun Alxanlı kəndi 82 və 120 millimetrlik minaatanlardan və dəzgahlı qumbaraatanlardan atəşə tutulub.

Ermənistan tərəfinin bu təxribatı nəticəsində kənd sakinləri 1967-ci il təvəllüdlü Quliyeva Sahibə İdris qızı və 2015-ci il təvəllüdlü Quliyeva Zəhra Elnur qızı həlak olublar.

Atəş nəticəsində qəlpə yarası alan 1965-ci il təvəllüdlü Quliyeva Sərvinaz İltifat qızı xəstəxanaya çatdırılaraq əməliyyata götürülüb.