Fərid Şahbazlı: "Bəzən mənə elə gəlir ki, uzun illər yaşamışam"

Bu gün "İslahatçı Gənclər" İctimai Birliyinin sədri (İGİB), Editor.az İnformasiya Portalının baş redaktoru Fərid Şahbazlı 23 yaşını qeyd edir. O, 23 illik ömür yolu barədə Ölkə.az-a danışıb.

"Mən özümü dərk edən gündən həyatımı planlı şəkildə qurmuşam"

Mən həmişə hesab etmişəm ki, hər il keçirilən ad günləri növbəti yaş üçün hesabat deməkdir. İlin sonunda biz öz vicdanımız qarşısında özümüzə hesabat verə biliriksə, demək həm ətrafımıza, həm də cəmiyyətimizə faydalı bir ömür sərf etmişik. Bəzən mənə elə gəlir ki, mənim olduqca xeyli yaşım var və mən uzun illər yaşamışam. Amma birdən düşünəndə ki, hələ 23 yaşım olur bir qədər rahatlıq tapıram.
Mən özümü dərk edən gündən həyatımı planlı şəkildə qurmuşam. Hər şeyin planlı şəkildə olması mənim üçün prioritetdir. İstər şəxsi həyatım olsun, istərsə də ictimai siyasi həyatım.

Bu gün 23 yaşımda həm həyatımda olan dostların sayəsində, həm də Allahın yaratdığı imkanlar sayəsində az da olsa öz istəklərimə, arzularıma çata bilmişəm.
"İnsanın ən böyük sərvəti onun qazandığı insanlardır"

Mən həmişə hesab etmişəm ki, insanın ən böyük sərvəti onun qazandığı insanlardır. Bu gün mənim ad günümdə əgər ölkəmizin müxtəlif bölgələrindən, dünyanın müxtəlif ölkələrindən, müxtəlif ictimai siyasi təbəqələri təmsil edən, ictimai statusu müxtəlif olan insanlar telefon açıb, mesaj yazıb məni təbrik edirsə, bu mənim ən böyük qazancımdır. Mənim üçün insan amili hər şeydən üstün dayanır. Çalışıram ki, öz ətrafım, cəmiyyət üçün faydalı insan olum. Bundan sonra da bu belə davam edəcək.

Adətən insanlar öz ad günləri barədə danışanda deyirlər ki, həmişə qarşıma pis insanlar çıxıb. Amma mən bu fikirlə razı deyiləm. İndiki günə kimi qarşıma çıxan böyük əksəriyyət insanlar mənə kömək ediblər. Yəni qarşıma yaxşı insanlar çıxıb. Paxıl və sənə mane olmaq istəyən insanlar isə həmişə var və bundan sonra da olacaq. Ümumilikdə mənim bu günə gəlib çatmağıma görə birömür təşəkkür etmək istədiyim insanlar var. Bu fəaliyyətə çatmaqda ailə üzvlərimin, həmçinin məni tanımadan bilmədən dəstək olan dostlar olub. Bu gündə ən böyük təşəkkürümü onlara edirəm, çünki dostların və ailə üzvlərinin dəstəyi olmadan heç kim uğur qazanmaq olmaz".

Biz də Ölkə.az kollektivi olaraq gənc ziyalı Fərid Şahbazlını 23-cü doğum günü münasibəti ilə təbrik edir, ona fəaliyyətində uğurlar arzu edirik.

Ölkə.Az