Politoloq: "Papa Fransiskin fikrində ABŞ-ın mövqeyi var"
Roma Papası Fransiskin Türkiyəyə səfəri zamanı Ermənistanla sərhəd məsələsinə toxunması bir neçə cavabsız sualların yaranmasına səbəb olub.
Belə ki, Fransisk yaxın vaxtda Türkiyə-Ermənistan sərhədlərinin açılacağına, Türkiyə ilə Ermənistan arasında münasibətlərin yaxşılaşması üçün dua və ümid etdiyini bildirib.
Məsələ ilə bağlı politoloq Elman Nəsirli öz şərhlərini Ölkə.az-la bölüşüb. Onun fikrincə, böyük siyasətdə bu cür hadisəni təsadüf hesab etmək olmaz.
"Hər halda Roma Papasının Türkiyə səfəri zamanı Türkiyə-Ermənistan sərhədlərinin açılmasını xüsusi qabartması təsadüfi hal deyildi. Ümumiyyətlə, böyük siyasətdə təsadüfi heç nə baş vermir. Hesab edirəm ki, Roma Papasını narahat edən çoxsaylı problemlər içərisində bu məsələni xüsusi qabartması ona dəlalət edir ki, onun bu mövqeyinin formalaşmasında digər amillər var. Təsiredici amillər sırasında mən ABŞ-ın mövqeyini xüsusi vurğulamaq istəyərdim.
Bilirsiniz ki, bu gün dünyada erməni lobbisi və diasporası B.Obamadan qətiyyətlə tələb edirlər ki, o, 2016-cı ildən sonra bir daha prezident olmayacaq. Onun tarixə yalançı prezident kimi daxil olması tələb olunur. Artıq belə bir təbliğata da başlanılıb.
Çünki o, 2008-ci il prezident seçkiləri öncəsi yazılı şəkildə bildirdi ki, prezident olacağı təqdirdə qondarma erməni soyqrımını tanıyacaq. Lakin indiyə kimi tanımayıb. Və ondan öz sözünün üstündə dayanmağı üçün qondarma erməni soyqrımının tanıması üçün yaxşı imkan tanındığını deyirlər. Hesab edirəm ki, Obama buna getməyəcək, amma əvəzində Türkiyəyə olan təzyiqi artıracaq. Artıq bunu hiss etmək də mümkündür. Həmin təzyiqlər təkcə siyasi sahədə deyil, həm də dini sferada da özünü göstərə bilər. Biz artıq bunun şahidiyik.
Qısacası, Fransiskin 3 günlük səfəri zamanı bu məsələni ön plana çəkməsində ABŞ-ın izlərini açıq şəkildə görmək mümkündür".
Qeyd edək ki, Türkiyənin bu məsələdə dəyişməz mövqeyi vardır. Həmin mövqedə kankret şərtlər irəli sürülür. Belə ki, yalnız Azərbaycanın işğal olunmuş ərazilərinin azad edilməsinə cavab olaraq sərhədlərin açılması məsələsi müzakirə oluna bilər.
Fatimə İbrahimova
Ölkə.az
