İsti su, lift və kupça üzünə həsrət qalan bina sakinlərindən
Şikayətçilərdən Vüsalə Muradova, İnarə Əlixanova və Ofeliya Əsgərova bu gün “Ölkə.Az”-ın redaksiyasına gələrək, mətbuata müraciət ediblər.
Şikayətçilər deyirlər ki, “Caspian Service” MMC-nin inşa etdiyi iki ədəd 17 mərtəbəli və bir ədəd 22 mərtəbəli binada yaşayan 112 mənzilin sahibləri 2003-2004-cü ildən bəri evlərinin kupçalarını ala bilmirlər.
“Üstəlik də bina sakinləri isti su, lift üzünə həsrət qalıb. Binaları inşa etdirən “Caspian Service” MMC-nin rəhbəri Rəhim Soltanov liftə kart qoydurub və pul ödəməyən sakinə kart vermir. Rəhim Soltanov bu ilin martından etibarən binada kommunal xərclərin qiymətini ikiqat qaldırıb. Bizdən adambaşına 1,5 manat kommunal haqqı tələb edilir. Belə də qiymət olar? Yaşadığımız bina sıradan bir binadır. Bu qiymət hovuzu, parkı olan binalarda belə yoxdur. Sakinlərdən heç kəs bu qiymətlə razı deyil. Hamı kommunal xərclərini özü ödəmək istəyir. Hətta, sakinlər yığılıb belə qərara gəliblər ki, “Nərimanov 6” adlı müştərək cəmiyyət yaradaq və binanın kommunal xərcləri da həmin cəmiyyət tərəfindən yığılsın. Ancaq Rəhim Soltanov hər addımda buna qarşı çıxır. Çünki o sakinlərdən kommunal xərc adı ilə artıq pul alıb özünə götürür. Biz sakinlərin adından ödənilən vəsaitin qəbzlərini Rəhim Soltanovdan tələb edirik. Ancaq o bunu bizə göstərmək istəmir. Bütün bunlara görə də 112 mənzilin sahibləri dövlətdən lazımı tədbir görülməsini istəyir. Problemimiz həllini tapmasa, məcbur olub ölkə başçısına müraciət edəcəyik, Prezident Administrasiyasının qarşısına gedib şikayət edəcəyik”, - deyə şikayətçilər qeyd edirlər.
Şikayətçi Vüsalə Muradovanın sözlərinə görə, sözügedən binanın bir qrup sakini avqustun 2-də Nərimanov rayon İcra Hakimiyyətində, avqustun 3-də isə Bakı şəhər İcra Hakimiyyətində görüşərək, şikayətlərini çatdırıblar:
“Bu gün biz Bakı şəhər İcra Hakimiyyəti başçısının müavini Rasim Quliyevin qəbulunda olduq. Görüşdə Rəhim Soltanov da iştirak edirdi. Biz bütün şikayətlərimizi bildirdik. Söylədik ki, Rəhim Soltanov 14 ildir mənzillərimizin kupçasını bizə vermir. Bizə açıq şəkildə deyir ki, əgər kupçanı versəm, o zaman pul ödəməyəcəksiniz. Binanın üzərinə radiasiya buraxan antenalar quraşdırıb, oradan da vəsait qazanır. Bu qanuna ziddir? Bütün bunlara görə Rəhim Soltanov cəzalandırılmalıdır. Görüş zamanı Rasim müəllim fikirlərimizi sonadək dinləyib, bizi dəstəklədiyini bildirdi. Eyni zamanda görüşdə Rəhim Soltanov açıq şəkildə bildirdi ki, o, bu əməllərini yenə davam etdirəcək. Heç kəsdən çəkinmədiyini söyləyir”.
Sözügedən şikayətlə bağlı Rəhim Soltanovun da fikirlərini öyrəndik.
O, “Ölkə.Az”-a açıqlamasında bildirdi ki, şikayətçilər yalan söyləyir:
“Biz heç zaman onlardan 1,5 manat pul tələb etməmişik. Bunu təsdiq edən müraciətlərimiz də var. “Xəzər Mənzil Servis” şirkəti adından hər bir sakinə bir neçə ay öncədən elan edilib ki, bina dövlət komissiyasına təhvil verilənədək mənfəətsiz işləməyi öhdəsinə götürür. Bundan əlavə, komendantın sayı azaldılır və real olaraq xidmət tarifi aşağı salınır, hər kvadrat metr üçün yay mövsümünə 0,70 AZN, qış mövsümünə 1,1- AZN, ortalama isə 0,90 AZN təşkil edir. Biz bu il iyulun 28-də elan vermişik ki, 138 və 140 saylı binada xidmət haqqı 0,55 AZN təşkil edir.
Kupçaların verilməməsi məsələsinə aydınlıq gətirən sahibkar qeyd etdi ki, bina sakinlərinin 200 min manata yaxın borcu olduğu üçün kupçalar verilmir. Binada tamamlanmayan işlər olduğu üçün müəyyən vəsait tələb olunur. Əgər sakinlər borclarını ödəsələr, işləri tamamlayıb kupçalar verərdik. Binanın tam hazır olması üçün FHN və digər qurumların rəyi lazımdır”.
Vasif Həsənli
Ölkə.Az
