Saxta dərmanlardan zəhərlənmələrin sayı artıb

Ekspert: "Bu gün apteklərdə ixtisası olmayan adamların işləməsi bu halların daha çox artmasına səbəb olur"

Noyabrda dərmanların əlavə təsiri nəticəsində allergik reaksiyadan zərər çəkənlərin sayı 15 nəfərə çatıb. Dərmandan zəhərlənmə hallarının əksəriyyəti əsasən antibiotiklərin və vitamin preparatlarının təsiri nəticəsində qeydə alınıb.

Ölkə.az-a danışan əczaçı Firun Yusifov zəhərlənmə hallarının artmasından danışıb.

"Əslində dərman zəhərlənmələri normal haldır. Çünki dərman elə bir vasitədir ki, onu heç nə ilə müqayisə etmək olmaz. Dərmanlar müəyyən dozalarda tətbiq olunur və xəstə dərmandan düzgün dozada istifadə etməzsə, bu nəinki onun zəhərlənməsinə, hətta ölməyinə də səbəb ola bilər.

İstənilən insan həkimin məsləhət gördüyü dozadan artığını qəbul edə bilər və bu da zəhərlənməyə, ya da allergik reaksiyalara səbəb ola bilər. Buna görə də həkimlər xəstələrinin allergik reaksiyalarına xüsusi diqqət etməlidirlər.

Onu da qeyd edim ki, bu gün apteklərdə ixtisası olmayan adamların işləməyi bu halların daha çox artmasına səbəb olur".

Qeyd edək ki, təkcə noyabr ayı ərzində dərman zəhərlənməsi ilə bağlı 32 nəfər təcili tibbi yardıma müraciət edib.

Fatimə İbrahimova

Ölkə.az