“Azərbaycanda oxunmalı 100 kitabın siyahısı müəyyənləşsin”

A.Həsrət “Ölkə.Az”-a açıqlamasında bildirib ki, Vasif Talıbov çox gözəl təşəbbüslə çıxış edib:

“O, oxunması tövsiyə olunan 30 kitabın siyahısını elan edib və bununla bağlı sərəncam da imzalayıb. Bu, əlbəttə ki, gözəl təşəbbüsdür. Təşəbbüsün gözəlliyi həm də ondadır ki, siyahıda Azərbaycanla yanaşı dünya ədəbiyyat nəhənglərinin əsərləri yer alıb. Şəxsən mən bu siyahıdakı kitabların bir çoxunu oxumuşam və oxunmasını hər kəsə tövsiyə edərdim. İndi çox hörmətli Vasif Talıbovun belə bir sərəncam verməsi çox gözəl təşəbbüsdür. İstərdim ki, ümumiyyətlə Azərbaycanda oxunmalı 100 kitabın siyahısı müəyyənləşsin”. 

A.Həsrət Vasif Talıbovun sözügedən sərəncamını sosial şəbəkələrdə məsxərəyə qoyanlara da cavab verib:

“Bu arada bəzi şəxslər bu sərəncamı da lağlağıya çevirmiş kimi görünməkdədirlər. Qınamıram. Adamların kitabdan, oxumaqdan bir anlayışı yoxdur ki, belə bir məsələyə də lağ edəcək durumdadırlar. Elə onların siyahıdakı kitabları oxuması, mənə elə gəlir ki, hamıdan əvvəl bu adamların özlərini çox maarifləndirmiş olardı. Bu əla bir təşəbbüsdür. Kim nə deyir desin, Vasif müəllim həqiqətən çox cəsarətli bir addım atıb. Şəxsən mən yüksək səviyyədə təqdr edirəm”.

Xatırladaq ki, Naxçıvan Muxtar Respublikası Ali Məclisinin sədri Vasif Talıbov oxunması tövsiyə olunan 30 kitabla bağlı sərəncam imzalayıb. 

Sərəncama əsasən, gənc nəsildə vətənpərvərliyin, tarixə, milli kökə bağlılığın və dünyagörüşün formalaşdırılmasına xidmət edən “Oxunması zəruri olan kitabların siyahısı” təsdiq edilib. Buna uyğun olaraq təhsil və mədəniyyət müəssisələrinin kitabxanalarında müvafiq kitab guşələri yaradılmalıdır.

V.Talıbovun kitab siyahısında müxtəlif janrlı yerli və xarici ədəbiyyatlara üstünlük verilib.

Məsələn, siyahıya “Kitabi-Dədə Qorqud” dastanı, “Atalar sözü” (Azərbaycan xalq ədəbiyyatı), ABŞ-ın 16-cı prezidenti Avraam Linkolnun oğlunun müəlliminə məktubu, Nikolay Ostrovskinin “Polad necə bərkidi”, Moris Meterlinknin “Arıların həyatı” və “Göy Quş” əsərləri, “İslamda müdrik kəlamlar”, Cəlil Məmmədquluzadənin “Hekayələr”, Nizami Gəncəvinin “Sirlər xəzinəsi”, Cek Londonun “Həyat eşqi” kimi kitablar daxil edilib.

Vasif Həsənli
Ölkə.Az