""Unibank"dan Vüsalın təhsil haqqıyla bağlı heç bir müraciət olmayıb"xa0 - Topçu Vüsal Şahkərəmovun anasıyla

- İlahə xanım, sizi təbrik edirəm...

- Çox sağ olun, mən də bütün xalqımızı təbrik edirəm. Hamının gözü aydın olsun, müharibə qurtardı, qələbə qazandıq. Şükür!

- Qələbədən sonra Vüsalla danışmısınızmı?

- Bəli, iki dəfə danışmışıq, kefi çox yaxşıdır. Elə əvvəlcə o bizi təbrik etdi, dedi ki, ay ana, bayramdır.

- Eşitdiyimə görə Vüsal hərbi xidmətdən qayıdandan sonra xeyir iş olmalıdır...

- Vallah, bilmirəm. Bildiyim qədər Vüsalın istədiyi olmamalıdır (gülür).

- (zarafatyana) Yəqin ki, seçiminə qarışmazsınız...

- Əvvəl gündən demişəm ki, kimi istəsə, onu da alacağıq. Atası da mənimlə eyni fikirdədir. Çünki atası da öz seçimiylə ailə qurub.

- Yanvarda hərbi xidmətdən qayıdır. Desə ki, martda, yaxud apreldə ailə qurmaq istəyirəm?

- (gülərək cavab verir) Yox, qarışmaram.

- Vüsalın təhsil haqqıyla bağlı məsələ nə yerdədir?

- O barədə çoxları soruşur, təkliflər gəlir. Hətta qapımıza gələnlər də olub. Dedik ki, sağ-salamat gəlsin, sonra baxaq.

- Aparıcı Mehin Hümbətovanın Vüsalın təhsil haqqını ödəməsi barədə xəbərlər var idi...

- Xeyr, elə bir söhbət olmayıb. Amma "Turanbank"dan gəlmişdilər.

- "Unibank"ın adı çəkilirdi axı...

- Yox, "Unibank"dan gələn olmayıb. Biz də hamıya demişik ki, Vüsal gəlsin, özü seçimini etsin.

- Hansı fakültəyə qəbul olmuşdu?

- Dəqiq yadıma gəlmir. Məncə, o, kollecə qəbul olmuşdu, universitetə bir balı çatmadı.

- Ancaq belə xəbərlər var idi ki, ali məktəbə qəbul olub, ödənişliyə düşdüyü üçün oxuya bilməyib...

- (zarafatyana cavab verir) Biz kəndçi adamlarıq da, iş-güc çox olur deyə, dəqiq bilmirik.

- Bu ərəfədə çox qonağınız olar.

- Gəlib-gedən çoxdur.

- Vüsalın məşhur videosu barədə soruşmaq istərdim. Adətən topçular topu atandan sonra ya aşağı əyilirlər, ya qulaqlarını tuturlar. Həmin videonun çəkilməsinin tarixçəsi maraqlıdır...

- Bizim kəndimizdən şəhidlərimiz var. Həmin şəhidlərin ikisi Vüsalın sinif yoldaşlarıdır. Vüsal hərbi xidmətdən əvvəl də deyirdi ki, erməni qarşıma çıxsa, bağırsaqlarını yerə tökərəm. Başqa sözlər də deyirdi...Oğlumla və onun həmin hərəkətiylə fəxr edirəm.

- Biz də fəxr edirik sizin övladınızla...

- Çox sağ olun, bütün xalqımız sağ olsun. Həyat yoldaşıma hər yerdən nə qədər zənglər gəlir, Vüsalın adına məclislər qurulur, fotolarını çəkib atasına göndərirlər.

- Yəqin ki, həmin məclislərə İslam kişi də dəvət edilir.

- Çox dəvətlər edilir.

- Dövlətimizdən bir istəyiniz, təmənnanız varmı?

- Dövlətimizdən heç bir istəyim yoxdur. Allah Prezidentimizə, xalqımıza, ordumuza can sağlığı versin.

Topçu Vüsal: