Erməni təxribatlarının pərdəarxası: Buna nail olmaq istəyirlər... - Polkovnikdən AÇIQLAMA
Bunu “Ölkə.Az”a açıqlamasında hərbi ekspert, polkovnik Şair Ramaldanov son günlərdə istər Azərbaycan-Ermənistan sərhədində, istərsə də, Xankəndidəki təxribat xarakterli hərəkətləri şərh edərkən deyib.
Onun sözlərinə görə, təxribat xarakterli hərəkətlərin olmasından və gərginliyin davam etməsindən istifadə edən Rusiya daha uzun müddət bölgədə qalmaq niyyətindən xəbər verir: “Sadə dillə desək, əgər ərazidə sabitlik olarsa, ermənilərlə azərbaycanlılar dil tapıb birgə yaşamağa üstünlük verərsə, o zaman rus sülhmərmalılarının bölgədə qalmasına zərurət qalmayacaq. Ötən bir il bu dediklərimizin bariz nümunəsidir”.
Ekspert əlavə edib ki, ötən bir il müddətində rus sülhməramlıları üzərinə düşən missiyanı yerinə yetirmədi: “Rus sülhməramlıları bölgədə dayanıqlı sülhün təmin edilməsi üçün onların nəzarəti altında olan ərazilərdə silahlıları tərksilah etmədi. Hansı ki bu onların missiyasına aiddir və bu, rus sülhməramlıları üçün elə də çətin şey deyil. Əgər silahlı separatçılar tərksilah edilmirsə, bu öz-özlüyündə suallar doğurur. Deməli, bu kiməsə lazımdır.
Azərbaycan bölgədə sülhün, əmin-amanlığın bərqərar olub, sıx inteqrasiya proseslərinin getməsində maraqlıdır. Azərbaycan tez bir zamanda bölgədə dinc həyatın bərpa olunmasına çalışır və bütün səyini də ortaya qoyub. Demək, ortada maraqlı qüvvələr var. Çünki ermənilərin məğlubiyyətindən bir il keçməsinə baxmayaraq rus sülhməramlılarının nəzarətində olan ərazilərdə hələ də əlisilahlı separatçı gəzirsə, deməli, onları orada saxlayan və maliyyələşdirən qüvvələr də mövcuddur. Axı əlisilahlı separatçılar kolxozçu deyil ki, gedib işləyib ailəsini dolandırsın. Nə də ki hansısa müəssisədə, tikintidə, fabrikdə işləyib pul qazanmır. Onlar heç bir yerdə işləməyən əlisilahlı şəxslərdir. Bəs necə və haradan dolanırlar? Deməli, onları maliyyələşdirənlər var. Onlar Ermənistandakı revanşist qüvvələr, xaricdəki diaspor təşkilatları tərəfindən maliyyələşirlər. Bəzi digər xarici qüvvələr də onlara dəstək verir. Ona görə də məsələ rus sülhməramlıları qarşısında konkret şəkildə qoyulmalıdır”.
Bir neçə gün öncə Xankəndi yaxınlığında postda baş verən hadisə ilə bağlı mövqeyini açıqlayan ekspert bildirib ki, terrorçunun milliyəti olmadığından, o, beynəlxalq qanunlara görə, cinayəti törətdiyi dövlətə təhvil verilməlidir: “Amma biz bunun tam əksinin şahidi oluruq. Düzdür, bu istiqamətə işlər gedir. Lakin sülhməramlıların terorçunu erməni tərəfinə verməsi düz deyildi”.
Ekspert onu da əlavə edib ki, gərginliyin yaradılmasının digər bir səbəbi də Azərbaycanla Rusiya arasında münasibətləri korlamağa yönəlib: “Ermənilər bu yolla rus sülhməramlılarının üzərinə götürdüyü missiyanı yerinə yetirməməyə diqqəti çəkməklə münasibətlərə xələl gətirməyə cəhd edirlər. Çünki Azərbaycan cəmiyyətində rus sülhməramlıları ilə bağlı məsələdə münasibətdə fikir ayrılığı mövcuddur. Onlar vəziyyəti gərginləşdirməklə niyyətlərinə nail olmaq istəyirlər”.
Hərbi ekspert bildirib ki, istər Ermənistan-Azərbaycan sərhədində, istərsə də rus sülhməramlılarının nəzarətində olan ərazilərdə vəziyyətin gərginləşməsinin digər əsas səbəbi son vaxtlarda İrəvan-Bakı arasında münasibətlərin normallaşması istiqamətində edilən cəhdlərin qarşısını almaq və buna mane olmaqdır: “Bildiyiniz kimi, Ermənistanla Azərbaycan arasında sülh sənədi, sərhədlərin delimitasiyası və demarkasiyası ilə bağlı komissiyanın yaradılması istiqamətində işlər gedir. Belə bir gərginliyi və təxribatları törətməklə prosesin qarşısını almağa və bacardıqca bunu ləngitməyə çalışırlar. Bu, digər tərəfdən də Zəngəzur dəhlizinin reallaşmasına mənfi təsir göstərən amildir. Hesab edirəm ki, bütün bu təxribatlar düşmənin istədiyi nəticəni verməyəcək”.
Mürtəza
Ölkə.Az
