Brüssel görüşü nə ilə yekunlaşacaq, Ermənistan nə istəyir? - AÇIQLAMAxa0
Ermənistan tərəfi hər zaman olduğu kimi danışıqlar prosesindən manipulyasiya etməklə əslində bölgədə real sülhün və sabitliyin yaranmasına yox, gərginliyin davam etməsində maraqlıdır.
Bunu “Ölkə.Az”a açıqlamasında deputat Əliabbas Salahzadə Azərbaycan və Ermənistan liderlərinin 14 dekabrda Brüssel görüşü öncəsi yaranmış vəziyyəti və sərhəddəki təxribat hadisələrini şərh edərkən deyib.
Onun sözlərinə görə, müharibə meydanında uduzan Ermənistan diplomatik və bütün platformalarda məğlubiyyətə uğrayaraq, imzalanmış kaputilyasiya sənədlərində əksini tapan müddəaları yerinə yetirmək əvəzinə, hər vəchlə bundan qaçaraq, bölgədə gərginliyin davam etməsinə çalışır.
“Amma Ermənistanın bütün bu cəhdləri iflasa uğrayacaq. Ermənistanın yürütdüyü 30 illik işğalçılıq siyasətinin acı sonluğunda olduğu kimi, növbəti mərhələdə də sərgilədiyi destruktiv mövqedən uduzan tərəf ancaq və ancaq özü olacaq. O baxımdan Ermənistanın başqa alternativi yoxdur və məğlub ölkə kimi üzərinə götürdüyü öhdəlikləri yerinə yetirmək məcburiyyətində qalacaq”, - deputat qeyd edib.
Deputat hesab edir ki, Ermənistan tərəfi danışıqlardan manupulyasiya edib, guya prosesi öz maraqlarına uyğun şəkildə yönəltməyə çalışır: “Ancaq bütün bu cəhdlər mənasızdır. Çünki Ermənistan 44 günlük müharibədə bütün bu şansları əldə verərək, danışıqlarsız kapitulyasiya sənədini imzalamağa məcbur olub. Digər tərəfdən isə Azərbaycan Prezidentinin yürütdüyü uzaqgörən siyasəti nəticəsində müharibə meydanında olduğu kimi, müharibədən sonrakı mərhələdə müharibənin nəticələrinin möhkəmləndirilməsi istiqamətdə yürütdüyü diplomatiya öz bəhrəsini verməkdədir. Bunun nəticəsidir ki, hətta özlərini Ermənistanın dostu, müttəfiqi hesab edən ölkələr Azərbaycanın haqlı mövqeyini dəstəkləmək məcburiyyətində qalırlar. Sadəcə, həmin qüvvələr Cənubi Qafqaz bölgəsində maraqlarını təmin etmək üçün Ermənistandan bir vasitə kimi istifadə edir. Ancaq unudurlar ki, vaxtı uzatmaq və üzərlərinə düşən tələbləri yerinə yetirməməkdən ziyan çəkən tərəf varsa, o da Ermənistan olacaq. Bir daha qeyd edirəm ki, 30 illik işğal nəticəsində Ermənistanın xarici havadarları onun üzləşdiyi böhrandan xilas edə bilmədisə, bundan sonra bu qeyri-mümkündür. Vaxt itkisi Ermənistanın ziyanına işləyəcək. Necə ki, biz bunun Soçi görüşlərinin yekunlarında, daha sonra 28 noyabrda Aşqabadda İqtisadi Əməkdşalıq Təşkilatının Zirvə görüşündə Ermənistanla eyni hərbi alyansda iştirak edən ölkələrin Azərbaycanın maraqlarını dövlət başçıları səviyyəsində dəstəklənməsində şahidi olduq.
Hesab edirəm ki, 14 dekabr Brüssel görüşü də Ermənistan üçün deyil. Daha çox Azərbaycan üçün uğurlu olacaq”.
Deputatın fikrincə bunu demək üçün əsasları var: “Birincisi, Brüssel görüşündə məsələ ilə bağlı hər hansı ciddi sənəd imzalanmayacaq. Ən azından ona görə ki, Avropa İttifaqı məsələnin həlli üçün uyğun platforma deyil. Çünki Avropa İttifaqı Ermənistan- Azərbaycan münaqişəsinin həllində birbaşa vasitəçi deyil, o ancaq ATƏT MQ çərçivəsində dolayısı vasitə ilə məsələnin həllinə öz təkliflərini verə bilər. Özü isə ancaq qarşılıqlı etimad mühitinin yaranması baxımından humanitar və iqtisadi layihələrdə iştirakını təklif edə bilər ki, bu da birbaşa Azərbaycanın maraqlarına xidmət edir. Aİ indiyədək münaqişənin həllində qarşılıqlı etimadın yaranmasını və bunun üçün kommunikasiyaların açılmasını təklif edib. Bu gün Azərbaycan da eyni şərti irəli sürür. Ancaq Ermənistan bunu icra etmir. Bir sözlə, Brüsseldə irəli sürüləcək hər hansı digər təkliflər olacaqsa belə, həmin səsləndirilən təkliflər daha çox Azərbaycanın marağına uyğun olacaq. Gərginliyin azaldılması və qarşılıqlı etimad mühitinin yaranması üçün kommunikasiyaların açılıb, sərhədlərdə gərginliyin azaldılması, humanitar və iqtisadi məsələlərdə bizim maraqlarımıza uyğundur. Ona görə ki, bütün bu deyilən və səsləndiriləcək fikirlər 10 noyabr 2020-ci il, 11 yanvar 2021-ci il və yaxud da 26 noyabr 2021-ci ildə Soçidə imzalanmış sənədlərdə əksini tapan tələblərdir. Hansı ki Ermənistan tərəfindən icra olunmur.
Digər xüsusi bir məqam isə ondan ibarətdir ki, həm Azərbaycan, həm də Ermənistan Aİ-nin Şərq tərəfdaşlığı platformasında yer alan ölkədir və bu tərəfdaşlıq proqramında yer alan ölkələrin müəyyən öhdəlikləri var. Aİ də bu proqramda yer alan ölkələrin bir-biri arasında münaqişənin, gərginliyin deyil, əməkdaşlığın olmasında maraqlıdır. Məsələyə bu prizmadan da yanaşanda Brüssel görüşünün daha çox Azərbaycanın maraqlarına xidmət edəcəyini əvvəlcədən demək mümkündür. Belə ki, 44 günlük Vətən müharibəsində sonra Azərbaycanın Cənubi Qafqazda yaratdığı yeni geosiyasi reallığın tələbləri əsasən region ölkələrinin birgə və sıx əməkdaşlığını nəzərdə tutur. O baxımdan da Brüssel görüşündən itirən tərəf olacaqsa, o da Ermənistan olacaq.
Əksinə, Azərbaycan Brüssel görüşü ilə bir daha özünü bölgədə sülhün, sabitliyin və əməkdaşlığın yaranmasında maraqlı tərəf kimi nümayiş etdirməklə növbəti diplomatik qələbəsini qazanacaq. Hesab edirəm ki, bu görüş Azərbaycanın postmünaqişə reallıqlarını beynəlxalq aləmə bir daha çatdırması üçün əlverişli imkan yaranacaq”.
Sərhəddəki son təxribatlara gəldikdə isə deputat deyib ki, gərginliklərin yaşanmamasının yeganə yolu sərhədlərin delimitasiyası və demarkasiyası prosesinin başlanılmasıdır: “Ermənistan başa düşməlidir ki, belə təxribatlara əl atmaqla heç nəyə nail olmayacaq. Bunun çox ağır və ağrılı nəticələrini necə ki indiyə kimi yaşayıb və bundan sonra da yaşayacaq. Ona görə də bu əməllərindən əl çəkməlidir. Cənab Prezidentin dediyi kimi istəlinən təxribatın və revanşist hərəkətlərin qarşısı həmən alınacaq və başları əziləcək. Dəmir yumruq havadadır və bundan sonra da baş qaldıranın başını əzməyə hazır vəziyyətdədir”.
Mürtəza
Ölkə.Az
