Prezidentin NATO mənzil-qərargahından xəbərdarlıq mesajı

Bunu “Ölkə.Az”a açıqlamasında deputat Soltan Məmmədov deyib.

Deputat bildirib ki, bu görüşlər bir daha Ermənistanın dalana dirənən ölkə olduğunu və Azərbaycanın şərtlərini qəbul edib icra etməkdan başqa yolu olmadığını sübut etdi.

“Azərbaycan Prezidenti cənab İlham Əliyev Brüsseldə təkcə qalib ölkənin lideri kimi deyil, həm də diktə edən tərəfin və şərtləri qəbul etdirən ölkənin lideri kimi iştirak edib, açıq formada bölgədə sülhün və sabitliyin yaranması, əməkdaşlıqla bağlı mövqeyini ortaya qoydu”, - deputat qeyd edib.

Deputat əlavə edib ki, Azərbaycan beynəlxalq tribundan sülhə, sabitliyə və proqnozlaşdırılmaya sadiq olduğunu növbəti dəfə nümayiş etdirdi: “Cənab Prezidentin NATO Baş katibi ilə görüşünün yekununda səsləndirdiyi kimi Azərbaycanın səyləri regionda hər hansı yeni müharibə risklərindən qaçıb, sabitliyin təmin olunub, əməkdaşlığın yaranması üçün ən yaxşı variant kommunikasiyaların açılması, aktiv dialoqun qurulması və yenidən qonşu olmağı öyrənməkdən keçir. Bu məsələdə Azərbaycanın yürütdüyü siyasət çox açıq və aydındır. Ümid edirik ki, Ermənistan yaranmış vəziyyəti dəyərləndirsə və xoş məramı olsa, düşmənçiliyə son qoyula bilər. Digər tərəfdən Azərbaycan yaranmış vəziyyətin Ermənistan üçün bir fürsət olduğunu da xatırlatmaqla yanaşı, gələcək əməkdaşlıq və kommunikasiyaların açılması, xüsusən də Zəngəzur dəhlizi ilə bağlı dövlətimizin qətiyyətli mövqeyini ortaya qoyaraq bəyan etdi ki, gələcək əməkdaşlıq, kommunikasiyaların açılması ilə bağlı Ermənistan üzərinə öhdəlik götürüb və bunu yerinə yetirməlidir.

Zəngəzur dəhlizinə gəldikdə isə cənab Prezident qalib dövlətin lideri kimi Azərbaycanın bu məsələdəki qətiyyətli mövqeyini beynəlxalq aləmin diqqətinə çatdıraraq bəyan etdi ki, Zəngəzur dəhlizinin hüquqi rejiminə gəlincə, bu, Laçın dəhlizinin eynisi olmalıdır. Ölkə başçısı bildirdi ki, Azərbaycan Qarabağla Ermənistan arasında əlaqə üçün təhlükəsizliyi və maneəsiz çıxışı təmin edir və Ermənistan Azərbaycanla Naxçıvan Muxtar Respublikası arasında əlaqələr üçün eyni maneəsiz çıxış və təhlükəsizliyi təmin etməlidir. Laçın dəhlizində gömrük olmadığı kimi Zəngəzur dəhlizində də gömrük olmamalıdır: “Əgər Ermənistan yük və insanlara nəzarət etmək üçün öz gömrük qurumlarından istifadədə israr etsə, onda biz Laçın dəhlizində eynisində israr edəcəyik. Bu, məntiqidir və qərar Ermənistan tərəfindən qəbul edilməlidir. Biz hər iki varianta hazırıq”. Prezident qəti mövqe ortaya qoydu.

Bununla cənab İlham Əliyev həm də Azərbaycan milli maraqlarımızın qətiyyətli şəkildə müdafiə etdiyini və bu mövqeyi beynəlxalq aləmə çatdırmaqla yanaşı, bölgədə sabitliyin, sıx əməkdaşlıq və inteqrasiya üçün hər zaman açıq olduğunu bəyan etdi.

Cənab Prezidentin bəyan etdiyi kimi Azərbaycanın irəli sürdüyü nəqliyyat layihələri regional nəqliyyat əlaqələrinin inteqrasiyası həqiqətən də region üçün böyük imkan yaradır. Bu baxımdan Zəngəzur dəhlizi təkcə Azərbaycana Naxçıvana çıxışını deyil, eyni zamanda Ermənistana Naxçıvan, Azərbaycan üzərindən İran və Rusiyaya çıxışını təmin edəcək. Bu həm də regionlararası əlaqələrdə və yükdaşımalarda müstəsna rol oynayacaq. Əlaqələrin yaranması isə regionda həqiqətən müsbət ab-hava yarada bilər ki, bu da hər kəsin xeyrinə olacaq.

Azərbaycan Prezidenti bu fikri Avropa İttifaqının paytaxtı və NATO mənzil-qərargahında açıq və qətiyyətli formada səsləndirməsi erməni havadarlarına və sülh prosesinə mane olan qüvvələrə ciddi bir xəbərdarlıq mesajı idi. Bununla da Azərbaycan düşmənçiliyə son verib, sülh naminə əməkdaşlığa hazır olduğunu dünyaya nümayiş etdirdi. Son olaraq bir daha onu qeyd etmək istərdim ki, artıq Ermənistan nəinki savaş meydanında, danışıqlar masasında da Azərbaycana ciddi şəkildə uduzmaqdadır və biz bunun hər görüşdə şahidi olmaqdayıq. Bu Ermənistanın çıxılmaz bir dalana və manevr imkanlarının tükəndiyini göstərir. Odur ki Ermənistan nə qədər tez bu reallığı dərk edib, konstruktiv mövqe sərgiləyərsə, onun xeyrinə olacaq və daha biabırçı uğursuzluqlardan xilas olacaq”.

Mürtəza
Ölkə.Az