Azərbaycan və Ermənistan liderlərinin Brüssel görüşünün gündəliyi bəlli oldu

Azərbaycan Prezidenti İlham Əliyevin, Avropa İttifaqı Şurasının sədri Şarl Mişel və Ermənistanın baş naziri Nikol Paşinyanın Brüsseldə keçiriləcək üçtərəfli görüşündə hər hansı sənədin imzalanması gözlənilmir.

“Ölkə.Az” xəbər verir ki,  bunu Ermənistanın Təhlükəsizlik Şurasının katibi Armen Qriqoryan “armenpress”ə açıqlamasında deyib.

Mayın 22-də Brüsseldə keçiriləcək üçtərəfli görüşlə bağlı məsələyə toxunan Qriqiryan deyib ki, Azərbaycanla müzakirələrimizin hazırkı gündəliyi məlumdur.

“Bunlar bizim və Azərbaycanın münasibətlərin normallaşması və ya sülh danışıqlarının başlanması üçün təqdim etdiyi təkliflər, əsirlərin qaytarılması və itkin düşmüş şəxslərin taleyinə aydınlıq gətirilməsi, regional kommunikasiyaların açılması, delimitasiya və demarkasiya, o cümlədən sərhəd təhlükəsizliyi üzrə ikitərəfli komissiyanın işinə başlaması ilə bağlı məsələlər". 

"Brüsseldə hər hansı sənədin imzalanması gözlənilirmi" sualına cavab olaraq Qriqoryan deyib ki, baş nazirin müavinlərinin həmsədrlik etdiyi regional kommunikasiyaların açılması üzrə üçtərəfli işçi qrupu var və ən yüksək səviyyədə əldə olunmuş razılaşmaların müzakirəsi bu formatda davam etdirilməlidir: “Ona görə də Brüsseldə heç bir sənədin imzalanması nəzərdə tutulmur. Müzakirələrin yekunlarına dair hesabatın olacağı gözlənilir”.

Mürtəza
Ölkə.Az