Hərbi ekspertlə ağdamlı alim arasında şəhid sayı qalmaqalı: "Üzr istəyəcəksinizmi?"
Tanınmış hərbi ekspert Ədalət Verdiyevin Birinci Qarabağ Müharibəsi zamanı Ağdam rayonunun 1026 şəhid verməsi ilə bağlı fikirləri sosial şəbəkələrdə müzakirələrə səbəb olub.
Ölkə.Az xəbər verir ki, o, rəqəmi Əmək və əhalinin Sosial Müdafiəsi Nazirliyinə (ƏƏSMN) istinad edib.
Ə.Verdiyev həmçinin bu vaxta kimi səsləndirilən 6000 və 7000 rəqəmlərinin həqiqətə uyğun olmadığını bildirib.
Onun bu fikirləri çoxları tərəfindən birmənalı qarşılanmayıb.
Ağdamlı siyasi elmlər üzrə fəlsəfə doktoru, dosent Zaur Əliyev Ə.Verdiyevin fikirlərinə kəskin etiraz edərək, onu şəhid ailələrinə hörmətsizlikdə ittiham edib:
"Yadıma gəlir, AZTV-də Heydər Əliyev görüş keçirirdi. O, çıxışında qeyd etdi ki, Ağdam 5500-dən artıq şəhid verib. Heç kim cəsarət edib Heydər Əliyevə düzgün olmayan məlumat verə bilməzdi. Sonralar da Heydər Əliyev bu rəqəmi bir neçə dəfə səsləndirib və heç kim də bunu inkar etməyib. Ağdamda şəhid olanların sayı 6 minə yaxındır.
İkincisi, ağdamlılar təkcə Ağdamda deyil, bütün Qarabağ boyu vuruşublar və şəhid veriblər. Bunu niyə bilmirsən? Axı dediyinə görə Qarabağda "döyüşlərdə olmusan".
Bakı və digər yerlərdə qeydiyyatı olan yüzlərlə ağdamlı gəlib birinci və ikinci müharibələrdə döyüşüblər. Rusiyadan tutmuş MDB ölkələrindən nə qədər ağdamlı müharibədə iştirak edib. Ağdamlı harada qeydiyyatda olmasından olmayaraq ağdamlıdır".
Z.Əliyev qeyd edib ki, Ağdamda müharibə dövründə üç Şəhidlər xiyabanı və bir də Qarağacı qəbiristanlığında dəfn edilənlərin sayı 1993-cü ilin mart ayında beş mindən çox idi.
"Ermənilər o məzarları dağıdıb, amma zamanla tapılacaq və sayı biləcəksiniz. O zaman Ağdam sakinlərindən üzr istəyəcəksiniz?
Ağdamın işğalından bir gün öncə 1993-cü il, iyulun 22-si idi. Həmin günü evlərini tərk etmək istəməyərək döyüşən və sonra şəhid olan 18 meyit gətirmişdilər, özləri də ağdamlı. Onların dördün dəfn etmək olmadı. Bunu ƏƏSMN bilir? ƏƏSMN indi 44 günlük müahribədə qazilərin düzgün sayını bilmir.İndi bu quruma inanıb belə söz deyirsiniz?
Qaçqınların və Məcburi Köçkünlərin İşləri üzrə Dövlət Komitəsinin rəsmi məlumatında da 6 min rəqəmi səslənir. Birbaşa onlarla işləyən qurum da səhv deyir?", - o qeyd edib.
Billurə
