Füzulidə 1 şəhər, 10 kənd bərpa olunacaq - Tarix açıqlandı

2022-2026-ci il “I Böyük Qayıdış Dövlət Proqramı” na əsasən ilk mərhələ işğaldan azad edilmiş ərazilərin minalardan təmizlənməsi, kənd və yaşayış məhəllələrinin layihələndirilməsi, dövlət ekspertizasından keçirilməsi, şəhərsalmanın əsaslandırılması və inşaat işlərinə başlanmasından ibarətdir. 

Ölkə.Az xəbər verir ki, bunu Prezidentin Ağdam, Füzili və Xocavənd rayonlarındakı xüsusi nümayəndəliyinin əməkdaşı Ümid İsazadə deyib. 

Onun sözlərinə görə, ümumlikdə 2026-cı ilə kimi işğaldan azad edilmiş ərazilərdə 8400 fərdi yaşayış evinin və 8800 mənzilin tikintisi nəzərdə tutulub.

İsazadə bildirib ki, plana uyğun olaraq Fizulidə 1 şəhər, 10 kəndin bərpa olunması nəzərdə tutulur.

"Minatəmizləmə əməliyyatlarından sonra hazırda ərazidə baza infrastrukturun qurulması işləri aparılır. Bura Zəfər yolu, Füzuli-Hadrut, Füzuli-Ağdam yolları və şəhərdaxili yol-kommunikasiya şəbəkələri də daxildir", - o qeyd edib.

İsazadə əlavə edib ki, şəhər qaz və elektrik enerjisi ilə tam təmin olunub. Digər sosial layihələrin icrasına başlanılıb.

Artıq 822 ailənin Füzuli şəhərinə geri qayıtdığını deyən Ümid İsazadə vurğulayıb ki, onlar burada xoşbəxt həyat sürürlər: "Bunu sosial şəbəkədə qarşınıza çıxan videolarda da görə bilərsiniz".

Mürtəza
Ölkə.Az