İzzət Bağırov restoranda düşən davadan DANIŞDI

Müğənni Ölkə.Az-a açıqlamasında bildirib ki, haqqında yazılanlar həqiqəti əks etdirmir:

"Mən şou proqramda oxuyurdum. Orada da ad gününü qeyd edən insanlar var idi, ortada oynayırdılar. Ad günü olanlardan birinin gətirdiyi operator məni çəkirdi. Məclis sahiblərindən bir oğlan operatora dedi ki, ə, onu çəkmə, onu çəkməyə gəlmisən bura? İki-üç dəfə eyni ifadəni təkrarladı və əliylə məni göstərərək dedi ki, buna görə səni bura çağırmamışam ki, bizi çək. Mən də mahnını oxuyub qurtarandan sonra dedim ki, müğənni adamam da, oxuyuram, o da çəkir. Əgər məni çəkməyini istəmirsənsə, mədəni şəkildə ona de ki, gəl bizi çək, bir-birimizə hörmətsizlik etməyək. Mikrofonu qoyub çıxandan sonra bunlar ardımca səhnənin arxasına gəldilər. Başladılar hədə-qorxu gəlməyə. Hamısı da içkili idilər, heç kim də heç kimə qulaq asmaq istəmir. Heç ordakıların çoxu söhbətin nədən getdiyini bilmirdilər". 

Bağırov cangüdəniylə restoran mühafizəçiləri arasında dava düşməsi haqda yazılanlara da aydınlıq gətirib:

"Orada mənim cangüdənim olmayıb. Ümumiyyətlə, mənim cangüdənim yox, işçim, prodüserim, köməkçim var. Yanımda cangüdən zad gəzdirmirəm. Orada restoranın mühafizəçiləri bunları sakitləşdirmək istəyirdilər. Başladılar bir-birinə əl-qol atmağa. Dava bayırda mühafizəçilərlə məclis sahibləri arasında olub. Mənimlə dava olmayıb. Mənim köməkçim də bayıra qapının ağzına çıxmışdı və davada xəsarət alıb. Onlar mühafizəçiləri vurub, mühafizəçilər də onları. Yazıblar ki, İzzət Bağırov kimisə döydürdü. İzzət Bağırov killerdir, kimdir ki, adam döydürə? Mən 27 ildir səhnədəyəm, indiyə qədər adam döydürmüşəm? Yoxsa mən elə birinə oxşayıram? İstəyirəm ki, bir-birimizə hörmətlə yanaşaq". 

Müğənni bildirib ki, köməkçisi dünəndən polisə çağırılıb və hələ də sərbəst buraxılmayıb:

"Polisə şikayət ediblər, ərizə yazıblar. Yəqin ki, məni də polisə çağıracaqlar. Orada dava edənləri çağırıblar. Köməkçim də dünən axşamdan polisdədir, izahat yazıb, özünü də hələ buraxmayıblar. Halbuki köməkçim də xəsarət alıb. Saytlarda hamısı mənim əleyhimə müsahibə verib. Onları da başa düşürəm. Amma and olsun Allaha, indiyə qədər harasa gedəndə ya tək getmişəm, ya da bir nəfər köməkçim olub, vəssalam". 

Qeyd edək ki, Report-un yaydığı xəbərdə hadisənin "Neolit" restoranında baş verdiyi qeyd edilir. Xəbərə görə N. Aslanlı və qohumları ilə İ.Bağırovun cangüdəni, habelə restoranın əməkdaşları arasında yaranmış mübahisə sonda əlbəyaxa dava ilə nəticələnib. Dava zamanı N. Aslanlının başına küt alətlə zərbə endirilib. Hadisə zamanı habelə onun oğlu, 16 yaşlı Vüsal Aslanlı da xəsarət alıb.

Onların hər ikisi xəstəxanaya yerləşdirilib. Həkimlər N. Aslanlının vəziyyətini ağır qiymətləndirir.

Faktla bağlı Nizami Rayon Polis İdarəsində araşdırma aparılır. 

İntiqam VALEHOĞLU
Ölkə.Az