Bina sakinləri Nəsimi RİH-dən Prezidentə şikayət etdilər

Bununla bağlı sakinlər “Ölkə.Az”-ın redaksiyasına da müraciət ediblər.

Müraciətdə qeyd olunur ki, sakinlər binanın sökülməsinə görə onlara ödənilən kompensasiyanın məbləğindən qəti narazıdırlar:

“Bu yaxınlarda mənzillərimizin sökülməsi ilə bağlı bizə bildiriş göndərilib. Ancaq orada qeyd olunan kompensasiya məbləği birmənalı olaraq heç bir sakini qane etmir. Mediadan xahişimiz odur ki, Bakı şəhəri, Nəsimi rayonu, Keykab Səfərəliyeva küçəsi 25 ünvanındakı bina üçün ayrılan vəsait və həmin vəsaitlə ev almaq imkanının olmamasını həm dövlət qurumlarına, həm də ictimaiyyətə çatdırılması üçün bizə köməklik edəsiniz. Əməkdaşlarınızın bizim ünvana gəlib reportaj hazırlamalarını xahiş edirik. Məlumat üçün bildirək ki, şəhərin mərkəzindəki binada mənzilimizi 20-30 min manat təklif etməklə bizə çox ədalətsiz, heç bir qiymətləndirmə prinsiplərinə sığmayan bir məbləği qəbul etməyimizi istəyirlər”.

Sakinlər məsələ ilə bağlı Prezident İlham Əliyevə, Birinci Vitse Prezident Mehriban Əliyevaya, Baş nazir Artur Rasizadəyə, maliyyə naziri Samir Şərifova və “Azəravtoyol” Açıq Səhmdar Cəmiyyətinin sədri Saleh Məmmədova müraciət ünvanladıqlarını bildiriblər:

“Bütün sakinlər adından kompensasiya məbləğinin azlığı ilə bağlı Prezident İlham Əliyevə, Birinci Vitse Prezident Mehriban Əliyevaya, Baş nazir Artur Rasizadəyə, maliyyə naziri Samir Şərifova və “Azəravtoyol” Açıq Səhmdar Cəmiyyətinin sədri Saleh Məmmədova müraciət ünvanlamışıq”.

Sakinlərin ölkə Prezidentinə ünvanladığı məktubu olduğu kimi dərc edirik:

“Azəbaycan Respublikasının Prezidenti

cənab İlham Əliyevə

Cənab Prezident!

Sizə müraciət etməklə 32 ailənin son ümüdü olan evimizlə əlaqədar yaranan problemin həlli ilə bağlı kömək istəyirik. Hazırda 32 ailə Bakı şəhəri, Nəsimi rayonu, Keykab Səfərəliyeva küçəsi 25 ünvanındakı beşmərtəbəli binanın 4-cü və 5-ci mərtəbələrində yaşayırıq.

Bu ilin iyul ayında Nəsimi rayon İcra Hakimiyyətinin və Mənzil İstismar Sahəsinin nümayəndələri bizə bildirdilər ki, yaxın vaxtlarda yaşadığımız bina söküləcək. Ancaq sökülərkən ədalətli kompensasiya veriləcək. Lakin 22.08.2017-ci il tarixdə bizə bildiriş verilmiş və 1 kvadrat metr üçün təqribən 1500 manat kompensasiyanın veriləcəyi barədə qeyd olunmuşdur. Xatırladaq ki, binadakı mənzillərin kvadratmetri bir otaqlılar 14-28 kvadratmetr, 2 otaqlılar isə 30-40 kvadratmetr arasında dəyişir.

Cənab Prezident, Sizə müraciət etməklə bildiririk ki, binada yaşayan ailələr kompensasiyanıln məbləğindən razı deyil. Belə ki, yaşadığımız ərazidə verilən kompensasiya hesabına ev almaq qeyri mümkündür. Yaşadığımız 28 may metrosu ətrafında, Keykab Səfərəliyeva küçəsi ərazisində binalarda mənzillərin tam təmirsizi 1 kvadrat metr üzrə minimum 2500 manata satılır.

Sizdən xahiş edirik, dəfələrlə özünüzün də bəyan etdiyi kimi digər pilot layihələrdə olduğu kimi bizə elə bir kompensasiya məbləği verilsin ki, mənzilimizə uyğun bir mənzil ala bilək. Yaxud elə binanın yerləşdiyi ərazidəki yeni tikililərdə mənzilləllə təmin olunaq. Qeyd edək ki, bu ərazidə 1 otaqlı mənzillərin minimum qiyməti 85 min manat təşkil edir.

Dəfələrlə Prezident Seçkilərində Sizə səs vermiş, Sizin daxili və xarici siyasətinizi tam dəstəkləyirik. 2018-ci il Prezident Seçkilərində də Sizi növbəti illər üçün bir daha Azərbaycanın Prezidenti görmək istəyirik. Sizə arxalanırıq və son ümüdümüz olan evimizin ədalətli prinsiplə qiymətləndiriləcəyinə inanırıq!

Hörmətlə,

Bakı şəhəri, Səfərəliyeva küçəsi, ev 25 ünvanındakı binada yaşayan sakinlər:

Əhmədova Fatma İsmayıl qızı,
Şirinova Xatirə Əbdüləli qızı,
Əliyev Yusif Zülfüqar oğlu,
Əliyev Yaqub Zülfüqar oğlu,
Əzizova Xatirə Məmmədəli qızı,
Novruzova Dilarə Məhərrəm qızı,
Ələkbərova Şüşəxanım Balaş qızı,
Məmmədova Zəminə Şirməmməd qızı,
Quliyev Teymur Umud oğlu,
Tomuyev Aypara Kərəm qızı,
Həsənov Zahir Zakir oğlu,
Qarayev Elman Rza oğlu,
Əliyeva Arzu Fəttah qızı,
Qocayeva Məsmə Tariyel qızı,
Hüseynova Sara İsmayıl qızı,
Ələkbərov Qaraş Alməmməd oğlu,
Rzayeva Ziyafət Sadıq qızı,
İbrahimov İnqilab Gülağa oğlu,
İsmayılova Mətanət Əhməd qızı,
Qasımov Çingiz Qurban oğlu,
Tomuyev Anar Zirəddin oğlu,
Hüseynova Laləzar Ramil qızı,
Hümbətov Şahbaz Mikayıl oğlu,
Məmmədova Almaz İbadulla qızı,
Həsənov Zeynal Hüseyn oğlu,
Seyidova Kifayət İmran qızı,
Süleymanov Bilal Vəli oğlu,
Əliyeva Əsli Abdulla qızı,
Əliyev Xanlar Səyyad oğlu”.