"Azadlıq radiosu"nun əməkdaşı Xədicə İsmayıl məhkəməyə aparılır

Elton Quliyev: "Xədicə İsmayıla bu gün həbs qərarı çıxarıla bilər"

Xədicə İsmayılovanın ailə üzvlərindən dərmanlarını və paltarlarını gətirməsini istədiyi bildirilir.

Dekabrın 5-də Binəqədi rayon məhkəməsində jurnalist Xədicə İsmayılovanın məhkəməsi davam edib. Prokuror jurnalistin həbsi ilə bağlı təqdimat verib. Hazırda o, Səbail Rayon Məhkəməsinə aparılıb.

Vəkil Elton Quliyev Azadlıq Radiosuna bildirib ki bu gün həbs qərarı çıxarıla bilər. Vəkil məhkəmənin onunla bağlı həbs qərarı çıxaracağını ehtimal edir. Jurnalist ailə üzvlərindən dərmanlarını və paltarlarını gətirmələrini istəyib.

Bu il fevralın 17-də Xədicə İsmayıl «facebook» şəbəkəsində Milli Təhlükəsizlik Nazirliyinin xidməti fəaliyyətinə aid olduğu ehtimal edilən material yayıb. Materialda MTN-in müxalifət partiyalarına casus yerləşdirməsindən bəhs olunur. Jurnalist ona bu materialı hazırda Fransada yaşayan sabiq MTN zabiti Ramin Nağıyevin 2011-ci ildə ötürdüyünü deyir. Sözügedən materialla əlaqədar Baş Prokurorluğun Ağır Cinayətlərə Dair İşlər üzrə İstintaq İdarəsində Cinayət Məcəlləsinin 284.2-ci (dövlət sirrini yayma) maddəsi ilə cinayət işi başlanıb.

Həmin materialda öz adının hallandığını iddia edən Elman Türkoğlu da Xədicə İsmayılı məhkəməyə verib. O, iddia ərizəsində jurnalistin Cinayət Məcəlləsinin 147-ci (böhtan) maddəsi ilə məsuliyyətə cəlb olunmasını istəyib.

Bu iddia üzrə oktyabrın 9-dan bəri Binəqədi rayon Məhkəməsində proses gedir.

Dekabrın 4-də Prezident Administrasiyasının rəhbəri Ramiz Mehdiyev “İkili standartların dünya nizamı və müasir Azərbaycan” adlı məqaləsində jurnalisti xəyanətdə günahlandırmışdı. (Meydan.tv)

****

Ölkə.az xəbər verir ki, bu barədə tanınmış bloqqer Mehman Hüseynov öz "Facebook" profilində yazıb.

Onun yazdığına görə, Xədicə İsmayıl Səbail rayon məhkəməsinə aparılır və onun barəsində həbs qəti-imkan tədbirinin seçiləcəyi gözlənilir.

Hadisənin gedişi haqda oxucularımıza məlumat verəcəyik.

Ölkə.az