Arxeoloqlar sunaminin 1700 il əvvəl məhv etdiyi qədim Roma şəhərini tapdılar

"Ölkə.Az" xəbər verir ki, arxeoloqlar itmiş və məhv olmuş şəhərləri daha çox su altında tapırlar.

İtalyan və tunisli alimlər Tunisin şimali-şərqindəki Nabel şəhəri yaxınlığında su altında qədim şəhər qalıqları kəşf ediblər. Neapolis adlı şəhər 1700 il əvvəl sunami nəticəsində yer üzündən silinib.

Aralıq dənizinin dibində mütəxəssislər küçələr, abidələr, heykəllər, 100-ə yaxın daş hovuz görüblər. Bu hovuzlarda qədim insanlar qarum adlı ərzaq hazırlaylblar. Qarum Qədim Romada və Qədim Yunanıstanda kifayət qədər məşhur balıq sousudur.

Tədqiqatçıların fikrinə görə, qarumun istehsalı və ixracı Neapolisin inkişafı üçün kifayət qədər vacib iqtisadi faktor olub. Komanda bildirir ki, 2010-cu ildən bu regionda tədqiqatlar aparılır. Amma qədim şəhərin qalıqlarına bu yaxınlarda rast gəliblər.

Qrupun rəhbəri Munir Fantar deyib: "Bu kəşf bizə imkan verdi ki, Neapolisin qarum və duzlu balıq istehsalının mərkəzi olduğunu sübut edə bilək. Güman edirik ki, bu şəhər Roma sivilizasiyasının ən böyük qarum və duzlu balıq istehsal mərkəzi olub".

Neapolis şəhərindən qalan dağıntılar 20 hektarlıq ərazidədir.

Şəhər eramızdan əvvəl V əsrdə salınıb. Yunan dilindən tərcümədə Neapolis yeni şəhər mənasını verir. Baş verən müharibələr nəticəsində şəhər müxtəlif dövlətlərin ərazisinə qatılıb. Neapolis Şimali Afrika regionunun ən vacib şəhəri sayılırdı. Çünki dənizə birbaşa çıxışı var idi.

Neapolis haqqında Roma tarixçilərinin qeydləri çox azdır. Çünki şəhər daimi olaraq İmperiyanın tərkibində qalmayıb. Eramızdan əvvəl baş verən 149-146-cı illər müharibəsində karfagenlilər tərəfindən işğal edilib. Bu səbəbdən arxeoloqların fikrinə görə qalıqlar şəhər haqqında daha çox məlumat verəcək.

Eramızın 365-ci ilinin 21 iyul tarixində Neapolis yaxınlığında baş verən güclü zəlzələ sunami dalğaları yaradıb. Qədim Roma tarixçisi Ammian Martsellin bu təbii fəlakət barədə qeydlər edib.

Alimlərin fikrinə görə təbii fəlakətin dalğası İskəndəriyyə, Siciliya, Yunanıstana da təsir edib. Krit adası xüsusilə bu fəlakətdən ziyan çəkib.

Hikmət Həsənov
Ölkə.Az