Müharibə meydanını xatırladan 15 milyonluq Kürsəngi-Yolüstü yolu
"Ölkə.Az" bildirir ki, sakinlər deyir ki, yolun bu hala düşməsində ən çox günahı olan və məsuliyyəti daşıyan şəxs Salyan rayon İcra Hakimiyyətinin keçmiş icra başçısı Tahir Kərimdovdur.
Kürsəngi-Yolüstü avtomobil yolu üzərində yerləşən kəndin sakinləri ilə görüşümüz zamanı bildirildi ki, sözügedən asfalt salınan vaxt ona 30 il istismar müddəti verilsə də, ancaq hazırda yolun vəziyyəti çox acınacaqlı haldadır.
“İndi Kürsəngi-Yolüstü avtomobil yolu 30-40 il əvvəl çəkilmiş asfaltı xatırladır. Sanki asfaltda yaranan yarğanlar müharibə, döyüş ərazilərindən qalıb. Adamın inanmağı gəlmir ki, bura 15 milyon manat pul xərclənib. Hərdən cəbhə xəttində yerləşən ərazilərimizə də yolumuz düşür. Orada müharibə gedir, ancaq yolları bu vəziyyətdə deyil. Ancaq Kürsəngi yolunun vəziyyətinə baxın. Görün bu yol 5-6 il əvvəl çəkilən yola bənzəyir? Bu cür yola 15 milyon necə xərclənib? Heç bir milyon da xərclənməyib. Hamısını Tahir Kərimov yeyib dağıdıb”, - deyə kənd sakinləri bildirir.
Yolun üzərində yerləşən kəndin sakinləri vəziyyətdən şikayətçidirlər. Onlar yolda yaranan çala-çuxurların əsas səbəbini işin keyfiyyətsiz görülməsində görürlər.
Sakinlər bildirirlər ki, 6 il öncə yolun salınması üçün Prezidentin Sərəncamı ilə ayrılan vəsait Salyan rayon İcra Hakimiyyətinin keçmiş başçısı Tahir Kərimov tərəfindən mənimsənilib:
“Nəticədə isə keyfiyyətsiz yol istifadəyə verilib. Tahir Kərimov yolun açılış mərasiminə qatılan ölkə başçısına da yalan məlumat verib. Açılışından cəmi bir il keçmədən yolda yaranmış çalaların və çatların çoxluğu ərazidən hərəkət edən avtomobillərin qəzaya uğramasına yol açır, böyük vaxt itkisi yaradır. İndi qarşıdan payız-qış ayları gəlir, yağışlar yağacaq, bu yolda hərəkət etmək qəti mümkün olmayacaq. Biz cənab Prezident İlham Əliyevə, hörmətli Mehriban xanım Əliyevaya, icra başçımız Sevindik Hətəmova və digər müvafiq qurumların rəhbərlərinə müraciət edib xahiş edirik ki, problemin həllinə yaxından köməklik göstərilsin”.
Yolun mövcud vəziyyətini əks etdirən fotoları da təqdim edirik.
Vasif Həsənli
Ölkə.Az
Fotolar müəllifə məxsusdur