Bilik günü yollarda vəziyyət necə olacaq?

Sabah yeni tədris ilinin başlanacağı gündür. Hər il olduğu kimi sabah da, Bakı küçələrində böyük tıxaclar müşahidə olunacaq. Sərnişinlər avtobus dayanacaqlarında saatlarla maşın gözləyəcəklər. Rəsmilər isə sabahkı günə böyük hazırlıq işlərinin görüldüyünü bildiriblər. Vurğulanıb ki, mümkün dərəcədə baş verəcək hansısa neqativ hadisənin qarşısı alınacaq.

Bakı Nəqliyyat Agentliyi ictimai əlaqələr və maarifləndirmə şöbəsinin müdiri Mais Ağayev “Ölkə.Az”a açıqlamasında bildirib ki, sabahkı günlə əlaqədar olaraq gücləndirilmiş iş rejimində çalışacaqlar. Onun sözlərinə görə, sabah paytaxtda fəaliyyət göstərən bütün sərnişin avtobuslarına nəzarət gücləndiriləcək.

“15 sentyabr Bilik günü ilə əlaqədar olaraq, sərnişindaşıma ilə məşğul olan bütün daşıyıcılara xəbərdarlıq edilib. Həmin günü səhər saatlarında, eyni zamanda dərs növbələrinin dəyişdiyi vaxtda və axşam radələrində avtobusların intervalına nəzarət gücləndiriləcək. Ehtiyac olan istiqamətlərə əlavə nəqliyyat vasitələri xəttə buraxılacaq”, - deyə Mais Ağayev bildirib.

Bakı şəhər Dövlət Yol Polisi İdarəsinin əməkdaşları da Bilik günü ilə bağlı gücləndirilmiş iş rejimində çalışacaqlar. Yolun hərəkət edən hissəsində avtomobillərini saxlanılmasına icazə verilməyəcək. Məktəb və digər təhsil müəssisələrinə yaxın yerlərdə dayanan maşınlar hərəkətə mane olarsa, bu zaman avtomobil dərhal oradan uzaqlaşdırılacaq.

Qeyd edək ki, sabah Azərbaycanda yeni tədris ili başlayır. 2017/2018-ci tədris ilində ölkə üzrə 164 945 nəfər şagird I sinfə gedəcək. Ötən illə müqayisədə I sinifə gedən şagirdlərin sayında artım var. Belə ki, 2016/2017-ci tədris ilində birinci 164 033 nəfər şagird ilk dəfə məktəbə qədəm qoymuşdu.

Ziya Səccad
Ölkə.Az