Rusiyada Azərbaycanlı milyarderin mədənində uçqun

“Ölkə.Az” xəbər verir ki, hadisə barədə Rusiya Fövqəladə Hallar Nazirliyinə məlumat daxil olub. Məlumat daxil olan kimi hadisə yerinə xilasedicilər cəlb olunublar.

Araşdırmalar zamanı məlum olub ki, hadisə zamanı yerin altında 6 nəfər olub. Uçqun nəticəsində bir mədənçi həlak olub. Xilasedicilər onun meyitini yerin altından çıxarıblar.

Ümumilikdə uçqun baş verən mədəndə 110 işçi var. Rusiya Fövqəladə Hallar Nazirliyinin regional idarəsinin məlumatına görə, digər mədənçilər işlərinə davam edirlər. Onların həyatı üçün heç bir təhlükə yoxdur.

Qəzanın hansı səbəbdən baş verdiyi araşdırılır.

Rusiya mətbuatının yazdığına görə, hadisə baş verən neft mədəni azərbaycanlı milyarder Vahid Ələkbərovun prezidenti olduğu “Lukoyl” şirkətinin strukturuna daxildir. 

Qeyd edək ki, Rusiyada mədəndə baş verən qəzalar son iki ildə xeyli artıb. 2017-ci ilin bu gününə qədər Rusiyadakı mədənlərdə 13 hadisə baş verib. Qəzalar nəticəsində ölən və yaralananlar olub. Bu ilin ilk qəzası aprelin birində qeydə alınıb. 2016-ci ildə isə Rusiya mədənlərində 8 hadisə baş verib ki, qəzalarda ölənlərin sayı 13 olub.

Ziya Səccad
Ölkə.Az