Bakıda qeyri-adi gün

Bu gün Bakıda Bilik günü çox qeyri-adi tərzdə keçdi. Çünki, hər il adət etdiyimiz kimi uzun-uzadı tıxaclar müşahidə olunmadı. Yolların bəzilərində avtomobillərin gündəlik sıxlığı olsa da, insanların səbrini daşdıran tıxaclar, avtomobillərin gərginlik yaradan siqnalları olmadı. Hətta sərnişin avtobusları hardasa qüsursuz işlədi. Əvvəlki illərdə olduğu kimi avtobusların qapısından sərnişinlər sallanaraq getmədi.

“Paytaxtda tıxac olmaması yol polislərinin gücləndirilmiş iş rejimində çalışması və ərazidə növbəli nəzarətin həyata keçirməsinin nəticəsidir”. Bu sözləri Bakı şəhər Yol Polis İdarəsindən “Ölkə.Az”a bildirdilər. Vurğulandı ki, bu il yollardakı hərəkət qüsursuz təşkil edilib.

“Bu gün paytaxtda yollarda hərəkət gözəl təşkil olunmuşdu. Əməkdaşlarımız bütün yol ayrıclarında, döngələrdə nəzarəti gücləndirmişdilər. Çalışacağıq bundan sonra Bakı yollarında tıxac olmasın. Baş verə biləcək bütün neqativ halların qarşısı vaxtında alınacaq”, - deyə qurumdan bildirilib.

Bakı Nəqliyyat Agentliyi ictimai əlaqələr və maarifləndirmə şöbəsinin müdiri Mais Ağayev “Ölkə.Az”a açıqlamasında bildirib ki, dünəndən bəri plana uyğun çəkilən əziyyət hədər getməyib. Onun sözlərinə görə, digər illərə nisbətən həqiqətən də, bu gün yollarda hərəkət tam təmin edilib.

“Dünən əvvəlcədən sərnişin daşıyıcılarına məlumat verilmişdi ki, avtobusların intervalına nəzarət edilsin. Maşınların sayı artırılsın. BNA-nın əməkdaşları gücləndirilmiş iş rejimində çalışırdılar. Sıxlıq olan ərazilərdə işıqforların işıqlarına müəyyən dəyişiklik edilib ki, tıxac olmasın. Bu gün Bakıda elə ciddi sıxlıq müşahidə olunmayıb. Gündəlik müəyyən ərazilər var ki, orada sıxlıq müşahidə olunub. Lakin ciddi narahatçılıq olmayıb”, - deyə M. Ağayev bildirib.
Sonda qurum rəsmisi bildirib ki, bundan sonra Bakı yollarında ciddi problemlər olmayacaq: “Çalışacağıq ki, həmişə belə davam etsin. Bundan sonra yollarda tıxac olmasın”.

Ziya Səccad
Ölkə.Az