Emmanuel Makron: "Qətərə qarşı embarqonu ləğv edin"
Fransa prezidenti Emmanuel Makron Qətərin əmiri Şeyx Təmim bin Haməd Əl Sani ilə Parisdə, Yelisey sarayında görüşüb.
"Ölkə.Az" xəbər verir ki, görüşdən sonra prezident aparatından verilən yazılı açıqlamaya əsasən, görüşdə Qətər və Orta Şərqdəki bəzi ölkələr arasındakı böhran müzakirə edilib.
Açıqlamada Makronun bölgənin sabitliyini təhlükəyə atan böhranların siyasi həllini və terrora qarşı kollektiv savaşın təsirinin qarşısını alan problemlər mövzusunda narahatlığını dilə gətirdiyi bildirilir.
Fransa prezidenti böhranın bütün tərəfləri ilə dostluq və təhlükəsizlik münasibəti quran rəsmi Parisin bu böhranda sürətli bir həll yolu tapılması məqsədi ilə Küveytin vasitəçilik rolunu dəstəklədiyini qeyd edib.
Açıqlamaya əsasən Makron Qətər xalqını, xüsusilə ailələrə və tələbələrə təsir edən embarqonun ən qısa zamanda ləğv edilməsini istəyib.
Hikmət Həsənov
Ölkə.Az
