"MDB dağılmaq üzrədir"

Azərbaycan prezidenti İlham Əliyev MDB Dövlət Başçıları Şurasının iclasında iştirak etmək üçün Belarusa səfərə gedib

Səfərdən gözləntilər barədə Ölkə.az Qafqaz Beynəlxalq Münasibətlər və Strateji Araşdırmalar Mərkəzinin rəhbəri Araz Aslanlı və politoloq Zərdüşt Əlizadənin fikirlərini öyrənib. Politoloqlara görə, bu görüşün heç bir özəlliyi yoxdur və xüsusi irəliləyiş gözlənilmir. 

Zərdüşt Əlizadə: "Bu görüş adi bir görüşdür. Hər hansı bir yeni irəliləyiş gözlənilmir. Əksinə MDB-nin aşınma prosesi gedir. Azərbaycan prezidentinin MİNSK səfəri onunla izah olunur ki, o, Rusiya ilə münasibətləri pozmamağa, hakimiyyətin başından xata-balanın mümkün qədər uzaq olmasına çalışır".

Araz Aslanlı: "Səfərlə bağlı o məqamları qeyd edə bilərəm ki, bu Azərbaycanın balanslaşdırılmış xarici syasətinin bir parçasıdır. Yəni Azərbaycan istəyir həm Qərb dövlətlərindən, həm də keçmiş sovet respublikalarından, eləcə də Rusiya ilə münasibətlərini normal şəkildə saxlasın. Bu səfər də onun tərkib hissəsidir. Mən burdan xüsusi MDB dövlət başçılarının zirvə görüşündən xüsusi bir yenilik gözləmirəm. Rusiya keçmiş SSR sərhətləri çərçivəsində müəyyən təşəbbüslər irəli sürməkdə davam edir. Bəllidir ki, Azərbaycan və bəzi digər dövlətlər bundan bir qədər uzaq durmağa çalışır. Düzdür, dövlət başçılarının özlərinin xüsusi gündəmi var. Sərhət məsələləri və.s. Mən hesab edirəm ki, Azərbaycan bu məsələdə nə çox aktiv, təşəbbüskar olmayacaq, nə də ki, Rusiyanın təklif etdiklərini bütünlükdə rədd etməyəcək. Balanslaşdırılmış xarici siyasət kursuna uyğun olaraq davam edəcək. Bizim siyasət xəttimiz heç kimlə qarşı-qarşıya gəlməmək, həmçinin isə öz maraqlarını qorumaqdan ibarətdir". 

Qeyd edək ki, bu gün MDB Dövlət Başçıları Şurasının Minskdə keçiriləcək iclasında birliyin sonrakı inkişafına dair 17 sənəd layihəsi nəzərdən keçiriləcək. MDB İcraiyyə Komitəsinin rəsmi saytının verdiyi məlumata görə, iclasda 2015-2019-cu illərdə qanunsuz miqrasiyanın qarşısının alınması ilə bağlı əməkdaşlıq proqramının müzakirəsi gözlənilir.

Fatimə İbrahimova

Ölkə.Az