Türkiyədə nə baş verir?
Azərbaycanlı siyasətçilər isə məsələyə birmənalı yanaşmırlar. Politoloq, millət vəkili Fazil Mustafa “Ölkə.Az”a açıqlamasında bildirib ki, onun istefa verməsi müxtəlif səbəblərdən baş verə bilər. Onun sözlərinə görə, Kadir Topbaş bu məsələyə aydınlıq gətirməlidir ki, bundan sonra prosesləri düzgün şərh etmək olar.
“İstanbul Böyükşəhər Bələdiyyəsinin sədri Kadir Topbaş yetərincə tanınmış və dini camaatın xəttinə bağlı şəxsdir. O, həm də hakimiyyətə yaxın insanlardan sayılır. Bu səbəbdən də, bu istefa çox müəmmalı görünə bilər. Onun istefa səbəbləri açıqlanmalıdır. K. Topbaşın istefası hakimiyyətdə müəyyən ziddiyətlərin olduğunu açıq şəkildə göstərir. Onu bu addımı atmağa ciddi əsaslar var. Bu səbəbləri açıqlamalıdır”, - deyə F.Mustafa bildirib.
Deputat deyir ki, K. Topbaş yetərincə güclü kadır olduğu üçün onun istefası vəzifəsinin öhdəsindən gələ bilməməklə bağlı ola bilməz:
“Kadir Topbaş İstanbul üçün çox yaxşı kadır idi. O, uzun illər idi İstanbul kimi böyük bir şəhəri idarə edirdi. Onu idarə etmək Türkiyəni idarə etmək qədər çətin bir işdir. Yəqin ki, yeri boş qalmayacaq. Lakin uzun müddət xatırlanacaq bir şəxsdir”.
Politoloq Elxan Şahinoğlu isə “Ölkə.Az”a açıqlamasında bildirib ki, K. Topbaşın istefası birbaşa Fətullah Gülən ilə əlaqəlidir. Onun sözlərinə görə, bu istefanı Türkiyə hökumətinin parçalanması kimi qələmə vermək düzgün deyil.
“K.Topbaş Türkiyə prezidenti Ərdoğanın ən yaxın adamlarından biri idi. İnanmıram ki, onun istefasını hökumətdə parçalanma kimi qələmə vermək düzgün fikir olar. Fətullah Gülən və FETÖ tərəfdarlarına qarşı həbslər həyata keçiriləndə, Topbaşın kürəkəni də saxlanılmışdı. Onun adı da FETÖ tərəfdarları ilə birgə hallanırdı. Çox güman ki, onun istefa verməsinə bu amil səbəb olub. Ərdoğan FETÖ və onun tərəfdarlarına qarşı çox sərt siyasət yürüdüb. Vaxtı ilə ona simpatiyası olan insanlar da həbs edilmişdi. Hesab edirəm ki, onun istefasında FETÖ amili mühüm rol oynayır. Ola bilər ki, hökumətdə K. Topbaşa inam azalıb və bunu hiss etdiyindən istefa verib”, - deyə Elxan Şahinoğlu bildirib.
Politoloq Adıgözəl Məmmədov da “Ölkə.Az”a açıqlamasında istefanın FETÖ ilə əlaqəli olduğunu deyib.
“K. Topbaş Gülən kadrı kimi o dönəmdə Ədalət və İnkişaf Partiyasında soxulmuş siyasətçilərdəndir. Türklərin dili ilə desək “bağırsaqların təmizlənməsi” prosesi gedir. Topbaşın İstanbul kimi böyük bir meqapolisin rəhbərliyindən uzaqlaşması Ərdoğanın Gülən camaatının Türkiyə daxili siyasi iradəsinin vıırulması kimi qəbul edilməlidir. Topbaş F.Gülənin bir nümayəndəsi idi. Nə qədər o, bunu başqa rənglərlə yozsa da, bu belədir. Onun istefasının da əsas səbəbi budur”, - deyə Adıgözəl Məmmədov əlavə edib.
Politoloq İlqar Altay isə “Ölkə.Az”a açıqlamasında bildirib ki, bu istefa Türkiyədə yuxarı elitanın bir-biri ilə arada yaranmış narazılığının səbəbidir.
“Düşünürəm ki, İstanbul bələdiyyəsi vəzifəsi adi vəzifəsi deyil. Elə bil ki, Türkiyədə yüksək vəzifələrdən birisidir. Bunun cəmiyyətə böyük təsiri var. Ərdoğan özü də İstanbul bələdiyyəsinin sədri işləyib. Belə bir böyük vəzifənin istefa verməsi kiçik səbəblərdən olmaz. Ən böyük insanlar arasında münasibətlərdən irəli gəlir. Yəqin ki, dövlət başçısı ilə aradakı siyasi uyğunsuzluqdan irəli gələ bilər. Anlaşma olmayandan sonra əlbəttə ikinci şəxs istefa verməlidir. Ölkə rəhbəri istefa verməyəcək. Bələdiyyə başqanı bu gün istefa verib. Düşünürəm ki, FETÖ sadəcə ortada söhbətdir. Türkiyənin yuxarı elitasında uyğunsuzluq yaranıb”, - deyə İlqar Altay bildirib.
Ziya Səccad
Ölkə.Az
