"İqtisadi maraqlar nəyi tələb edirsə Türkiyə də onu edir"

Türkiyənin enerji və təbii sərvətlər naziri Taner Yıldız bildirib ki, Avropa İttifaqının Rusiyaya qarşı sanksiyalar tətbiq etməsinə baxmayaraq, Ankara bu ölkə ilə əməkdaşlıq edəcək. Bununla bağlı millət vəkili Fazil Mustafa və politoloq Fərhad Mehdiyev mövzunu Ölkə.az-a şərh ediblər.

Fazil Mustafa: "Türkiyəyə qarşı münasibətlərdən Türkiyə artıq bezib. Avropa Türkiyəni yaxın şərqdə özünə ən yaxın dövlət sayır, ancaq Türkiyəyə etibar etmirlər. Türkiyəni Avropa Birliyinə almırlar. Türkiyənin daxili işlərinə qarışırlar. Ona görə də, Türkiyənin seçimi doğrudur. İqtisadi maraqlar nəyi tələb edirsə Türkiyə də onu edir. Avropa Birliyinin Rusiyaya tətbiq etdiyi sanksiyaların Türkiyəyə heç bir aidiyyatı yoxdur. Türkiyə müstəqi dövlətdir, özünün iqtisadi maraqlarını təmin etmək üçün istədiyi addımı atmaqda haqlıdır. Avropa Birliyi öz payına düşən paydan Türkiyəyə verməyəcək.

Türkiyəni alçaltmaq üçün, zəiflətmək üçün hər şey edirlər. Türkiyə doğru addım atır".

Fərhad Mehdiyev: "Ankara Rusiya ilə əməkdaşlıqdan çəkilməyəcək. Ticarət dövriyyəsini artıracaq və ixrac defisitini Rusiyanın hesabına qapatacaq. Avropa Birliyinə gəldikdə isə, yaxın müddət ərzində Türkiyəyə qarşı sanksiya tətbiq etməyəcək, lakin diplomatik vasitələrdən istifadə edəcək".

Səxavət Məmməd
Ölkə.az