Bu il sərt qışda hansı problemlərlə qarşılaşacağıq?

“Ölkə.Az” xəbər verir ki, bunu mətbuata açıqlamasında Milli Ekoloji Proqnozlaşdırma Mərkəzinin rəhbəri Telman Zeynalov deyib.

T.Zeynalov qış mövsümündə havaların şaxtalı olacağını deyib: “İndidən sərt qışa hazır olmalıyıq. Ötən il oktyabrın 20-dən sonra paltoya keçmişdik. Bu il qış geyimlərinə daha tez keçiləcək. Ötən qışda Bakıya, rayonların bəzilərinə qar bir qədər az yağmışdı. Cari mövsümdə bunun əksi müşahidə olunacaq. Qar daha çox yağacaq, havalar şaxtalı olacaq. İllər ötdükcə buzlaşma hiss olunacaq, havalar tədricən soyuyacaq”.

Bu xəbərdarlıqdan sonra cəmiyyətdə müəyyən narahatlıq yaranıb. Çoxu qışın sərt keçməsinə görə kommunal sahədə yaranacaq problemlərdən narahatdır. Sosial şəbəkələrdə bildirirlər ki, sərt qışın ağır nəticələri özünü elektrik enerjisində, təbii qaz istehsalında və içməli suyun kəsilməsində göstərəcək. Yenə də, yağış suları yollara, evlərə dolacaq.

Qışın sərt keçməsinə rəsmi qurumlar hazırdımı?

Rəsmi qurumlardan isə əhalini əmin etməyə çalışırlar ki, bu qış heç bir problem yaşanmayacaq.

“Azərişıq” ASC-nin mətbuat xidmətinin rəhbəri Tanrıverdi Mustafayev  “Ölkə.Az”a açıqlamasında bildirib ki, qışın necə sərt keçməsindən asılı olmayaraq, ölkədə hər kəsin işığı yanacaq. Onun sözlərinə görə, anidən yarana biləcək bütün problemlər də tez bir zamanda həll ediləcək.

“Bizim işimiz hava şəraitindən asılı olmayaraq, 24 saat hər bir abonentimizi keyfiyyətli və fasiləsiz elektrik enerjisi ilə təmin etməkdən ibarətdir. Havanın necə sərt keçməsindən asılı olmayaraq, biz öz işimizi qurmuşuq. Şaxtalı və küləkli hava belə bizi qorxutmur. Nə qədər də sərt qış olsa, “Azərişıq” ASC abonentlərini 24 saat fasiləsiz və keyfiyyətli elektrik enerjisi ilə təmin edəcək”, - deyə Tanrıverdi Mustafayev  bildirib.

“Azəriqaz” İstehsalat Birliyinin İctimaiyyətlə əlaqələr şöbəsinin rəisi İbrahim Kərbalayev “Ölkə.Az”a açıqlamasında bildirib ki, 2017-2018-ci il tədbirlər proqramına uyğun olaraq bütün çətinliklərə hazırlıq işləri görülüb. Onun sözlərinə görə, qış aylarında əhalinin təbii qaz problemi olmayacaq.

“Tədbirlər proqramına uyğun olaraq, cari ilin 8 ayı ərzində 25900 metrdən çox qaz xətti təmir edilib. Eləcə də, yeni qaz xətləri çəkilib. 274 ədəd qaz sayğacı quraşdırılıb. Respublika ərazisində bu il 958,3 kilometr müxtəlif diametrlik qaz xətləri çəkilib. 143,3 kilometr  qaz kəməri əsaslı təmir edilib. Regionlar üzrə 40 qəsəbə və kəndə təbii qazın verilməsi təmin edilib. Qışa hazırlıq yay aylarından başlanılıb. Qaz təsərrüfatında ilin bütün fəsillərində qaz xətləri üzərində tənzimlənmə işləri aparılır. Havalar soyuduqca təbii qaza olan təlabat da artır. Əgər hansısa ərazidə problem yaranarsa, mütləq bizim “qaynar xətt”ə müraciət etsinlər. "Azəriqaz" İB-nin 104 və 185 saylı çağrı mərkəzi fasiləsiz olaraq işləyir. Hansısa ərazidən çağırış daxil olduqda, qeydiyyata alınaraq lazımi ünvana göndərilir. Təcili əraziyə əməkdaşlar göndərilir və lazımı tədbirlər görülür”, - deyə qurum rəsmisi bildirib.

İ. Kərbalayev deyir ki, əhali qış aylarında təbii qazdan ehtiyatla istifadə etməlidir: “Hər kəs texniki qaydalara əməl etməklə baş verəcək bədbəxt hadisələrin qarşısını almış olar”.

Ötən illərdən “Azəristiliktəchizat” ASC-nin “Azəriqaz”a borclu olması üzündən müxtəlif vaxtlarda istilik sisteminin işində fasilələr yaranmışdı. İ. Kərbalayev bu il belə olmayacağına əmin edir: “Bizim müraciətimiz əsasında “Azəristiliktəchizat” ASC-nin köhnə borcları hissə-hissə ödənilir. Bizim tərəfdən həmin quruma müraciətlər də olub. Bu barədə işlər aparılır. Çalışılacaq ki, burada vətəndaşlar əziyyət çəkməsinlər. Lakin borcların ödənilməsilə bağlı müraciətlər daxil olur”.

Məsələ ilə əlaqədar “Azəristiliktəchizat” ASC ilə əlaqə saxladıq. Qurumun Abonent və müştəri xidmətlərinin rəisi Rafiq Əliyev  “Ölkə.Az”a açıqlamasında bildirib ki, hazırda payız-qış mövsümünə uyğun işlərin təşkili gedir. Onun sözlərinə görə, bu il sərt qış olmasına baxmayaraq, əhali istilik sarıdan korluq çəkməyəcək.

“Qrafikə uyğun olaraq lazımı tədbirlər görülür. Uzağı oktyabr ayının 15-nə qədər bütün hazırlıqları bitirməyi nəzərdə tutmuşuq. Hazırda qrafik üzrə iş gedir. Elə bir ciddi problemimiz yoxdur. Noyabrın 15-dən istilik sistemi fəaliyyətə başlayacaq. 2015-ci ildə "Azəriqaz" İB-nə borclu olduğumuza görə iki qurum arasında problem yaranmışdı. Sonradan məsələ lazımı həllini tapdı. Çalışacağıq ki, istehlakçılarımız əziyyət çəkməsinlər”, - deyə R.Əliyev  bildirib.

Onun sözlərinə görə, əgər soyuqlar tez düşsə, o zaman əhaliyə istilik də noyabrdan tez verilə bilər: “Əgər havalar tez soyuyarsa, istilik sistemləri tez işə salına bilər. Bundan başqa, bizim təşkilatlarla, qurumlarla müqavilələrimiz var. Həmin müqaviləyə də uyğun olaraq, hansısa təşkilat istilik sistemlərinin tez işə salınmasını istəsə, bu zaman bizə müraciət edə bilərlər. Əgər bir neçə gün ərzində orta sutkalıq tempratur normadan aşağı olsa, əhaliyə istiliklər vaxtından əvvəl verilə bilər”.

Bu il qış sərt keçsə, su və kanalizasiya baxımından da ölkədə problem yaşanmayacaq. Bu barədə “Azərsu” ASC-nin mətbuat xidmətinin rəhbəri Anar Cəbrayıllı “Ölkə.Az”a məlumat verib. Onun sözlərinə görə, bu qış hər şey normal olacaq.

“Ola bilər ki, bəzi fərdi evlərə çəkilən su xətləri dayaz basdırıldığı üçün donmalar olsun. Bu əsasən həyət evlərində olur. Belə hadisələr baş verməsin deyə, həmin şəxslər su borularını şaxtadan qorumaq üçün lazımı tədbirlər görməlidirlər”, - deyə Anar Cəbrayıllı bildirib.

Qurum rəsmisi deyir ki, bundan sonra yağan güclü yağış adət etdiyimiz kimi küçələrə və yollara dolmayacaq: “Nazirlər Kabinetinin sərəncamına əsasən  subasma ehtimalı olan 13 ünvanda işlər həyata keçirilib. Artıq bunların 8-də işlər bitib. 5 ünvanda - Ziya Bünyadov prospekti, yəni Dərnəgül yolu, Sabunçu, Xətai və Yasamal rayonları əraizisndə isə işlər davam edir. İşlər bir ay ərzində yekunlaşacaq. Bu da öz növbəsində həmi ərazilərədə yağış və qrunt sularının qarşısını almağa imkan verəcək. Bir sözlə deyə bilərik ki, “Azərsu” ASC payız-qış mövsümünə hazırdır və qarşıdakı aylarda əməkdaşlarımız daha səylə çalışacaqlar”.

Ziya Səccad
Ölkə.Az