Fransada yeni kəşf

Fransa muzeyində saxlanılan bir rəsm əsəri alimlərin diqqətini çəkib.

"Ölkə.Az" xəbər verir ki, muzeydə 150 ildən artıqdır ki, saxlanılan və kömürlə çəkilən portret Mona Lizanın eskizi ola bilər. Fransalı sənət eksperti bu fikrə gəlib.

Monna Vanna kimi tanınan portretin Leonardo da Vinçinin studiyasında hazırlandığı bilinir. Ekspertlərin fikrinə əsasən, rəssam hər iki əsər üzərində işləyib. Luvr muzeyinin əməkdaşlarının ekspertizasından sonra məlum olub ki, çılpaq qadın portretini də Da Vinçi özü qələmə alıb.

1862-ci ildən bu rəsm əsəri Şantiy sarayındakı Konde muzeyində İntibah dövrünə aid əsərlər arasında saxlanılır. Muzey Parisin şimalında yerləşir.

Konde muzeyinin kuratoru Matye Deldik deyib: "Rəsm əsərində həqiqətən də əl və üz cizgiləri əla çəkilib. Leonardo ömrünün son dövründə Mona Liza əsəri ilə paralel olaraq bu rəsm üzərində işləyib. Çox güman ki, bu cizgilər yağlı boya üçün hazırlıq işidir.

Luvr muzeyinin eksperti Bruno Moten isə rəsm əsərinin çox yüksək keyfiyyətdə olduğunu bildirib. Eyni zamanda qeyd edib ki, əsərin hazırlanması Da Vinçinin XVI əsrdə xaricdə yaşadığı dövrə təsadüf edir.

Əsərlər eyni ölçüdədir. Əllər və bədən demək olar ki, eynidir.

Leonardo da Vinçi italyan İntibahının ən önəmli rəssamlarından sayılır. Onun "Cakonda" kimi də tanınan "Mona Liza" əsəri dünya sənətinin ən nadir incilərindən biridir. Bir versiyaya görə əsər Liza Gerardiniyə məxsusdur. Onun əri, florensiyalı məmur və parça taciri Françesko del Cokondo bu əsəri rəssama sifariş edib.