"Danışıqlar prosesi uzadılsa, hərbi planlar işə düşəcək"
Türkiyəli nazir açıqlamasında bildirib ki, biz Azərbaycanla vahid dövlət kimi hərəkət edirik. Bizim gücümüz - Azərbaycanın gücü, Azərbaycanın gücü - Türkiyənin gücüdür. Hərbi təlimlər əməkdaşlığımızın yalnız bir hissəsidir. Azərbaycan və Türkiyə Silahlı Qüvvələri vahiddir. Bunu hər kəs bilməlidir.
Hərbi sənaye sahəsinin inkişafına toxunan nazir bildirib ki, Türkiyə və Azərbaycan ən ağır məqamlarda xarici dövlətlərdən silah alınması problemi ilə üzləşib. Ona görə də biz müdafiə sənayesi sahəsində səylərimizi gücləndirməliyik.
Türkiyə-Azərbaycan arasında artan xətt üzrə davam edən hərbi əməkdaşlıq isə Ermənistan tərəfini ciddi narahat edir. “Daşnaksütyün” rəsmisi Kiro Manoyan bildirib ki, Azərbaycan böyük hərbi əməliyyatlara hazırlaşır. Hərçənd, bu, hələ o demək deyil ki, müharibə mütləq olacaq.
İki tərəfin səsləndirdiyi fikirləri politoloq İlqar Vəlizadə "Ölkə.Az"-a şərh edib:
"Azərbaycan-Türkiyə arasında hərbi münasibətlər heç kəsə sirr deyil və bunu nə rəsmi Bakı, nə də rəsmi Ankara gizlətmir. Aydındır ki, hər iki tərəf bu əməkdaşlığı təhlükəsizliyini qorumaq məqsədi ilə edir. Azərbaycanın 20% torpağı işğal altındadır. Əlbəttə ki, Azərbaycan işğal altındakı torpaqlarını azad etmək üçün bütün ölkələrlə hərbi əməkdaşlıq edə bilər, o cümlədən Türkiyə ilə hərbi əməkdaşlıq edir".
“Daşnaksütyün” rəsmisinin "Azərbaycan müharibəyə hazırlaşır" bəyanatına gəldikdə isə politoloq bildirdi ki, bu, sürpriz bir şey deyil:
"Azərbaycan 20 ildən çoxdur ki, müharibəyə hazırlaşır. Son illər ərzində hərbi büdcəmiz 1 milyard dolları aşıb. İşğal faktı olduğu üçün müharibəyə hazırlıq gedir. Sadəcə olaraq cəbhədəki vəziyyəti və danışıqlar prosesinin uğursuzluğunu nəzərə alaraq Azərbaycan konkret tədbirlərə əl atıb. Artıq keçmişdəki kimi Ermənistan cəbhəyani ərazilərimizi iri çaplı silahlarla vura bilmir. Bir neçə il bundan əvvəl Ermənistanın helikopteri vurulduqdan sonra artıq ermənilər sərbəst uçuşlar apara bilmirlər. Bu isə erməniləri qıcıqlandırır".
Son bəyanatlar və son gedişatlara gəldikdə İlqar Vəlizadə qeyd etdi ki, danışıqlarda irəliləyiş olsa, onda hərb strategiyası arxa plana keçə bilər:
"Danışıqlar prosesi uzadılsa, yenə imitasiyalar edilsə, hərb planları özü-özülüyündə işə düşəcək".
Səxavət Məmmd
Ölkə.Az
